टाळेबंदी लागली तर मोलकरणींसाठी अनेक घरांचे दरवाजे बंद होण्याची भीती

हिंगोली : कोरोनाचा वाढता कहर लक्षात घेता अनेक घरी मोलकरणींची सेवा बंद केली जात आहे, तर काही ठिकाणी मात्र योग्य काळजी घेत मोलकरणी सेवा देत आहेत. पुन्हा टाळेबंदी लागली तर मात्र गेल्यावर्षीसारखी उपासमार सोसण्याची वेळ येण्याची भीती अनेक मोलकरणींना वाटत आहे.

हिंगोली शहरात हजार ते बाराशे माेलकरणी घरोघर जाऊन धुणी, भांडी, झाडू-पोचा आदी कामे करतात. दैनंदिन कामाच्या व्यापात अथवा मोठ्या घरी कामाचा जास्त व्याप लक्षात घेता मोलकरणींचे महत्त्व जास्त आहे. मात्र कोरोनाच्या काळात भीतीने गेल्यावर्षी टाळेबंदी लागताच सर्वांत आधी या मोलकरणींवर बेकारीची कुऱ्हाड कोसळली होती. अनेक घरांचे काम करूनही जेमतेम रक्कम हाती पडणाऱ्या या मोलकरणींच्या हातचे काम गेल्याने अनेकींना उपासमारीचे संकट झेलावे लागले. त्यातच काहींनी इतर कामे करून कुटुंबाचा गाडा हाकला. मध्यंतरी कोरोनाची लाट ओसरल्यानंतर पुन्हा हाताला काम लागले होते. मात्र आता पुन्हा दुसऱ्या लाटेत काही जणांनी भीतीपोटी मोलकरणी बंद केल्या. तरीही अनेक घरी मात्र अजूनही मोलकरणी काम करीत आहेत. जर पुन्हा टाळेबंदी लागली तर नेमकी बसत असलेली आर्थिक घडी पुन्हा विस्कटण्याची चिंता या मोलकरणींना सतावत आहे.

तर हाता-तोंडाची गाठ मुश्कील

या काळात बाहेर पडणेही अवघड असते. घराच्या नजीकची कामे तेवढी जीव धोक्यात घालून बाहेर पडून करता येतील. मात्र इतरांचे काय? ही सर्व कामे केली नाही तर हाता-तोंडाची गाठ पडणे मुश्कील आहे.

एका घरातून पाचशे ते हजार

सध्या एखाद्या घरी भांडी तर एखाद्या घरी धुणी असे काम मिळते. क्वचितप्रसंगी एकाच घरात धुणी व भांडी असे काम मिळते. त्यामुळे धुणी, भांडी, झाडू व पोचा या प्रत्येक कामास प्रत्येकी सहाशे रुपये मिळतात, तर घरातील सदस्यसंख्या जास्त असेल, खोल्यांची संख्या जास्त असेल तर सातशे ते आठशेपर्यंत मिळतात.

सहा तोंडांचे पोट कसे भरणार?

माझ्या कुटुंबात सहा जण आहेत. पतीची घरासाठी फारशी मदत होत नाही. मुले लहान आहेत. इतर सदस्य ज्येष्ठ आहेत. कधीतरी त्यांच्या कामाची रक्कम मिळते. दहा ते बारा घरचे काम करून सात हजार पदरी पडतात. तेही मिळणार नसतील तर पोट कसे भरायचे?

- कल्पना राऊत

पतीला मदत म्हणून काही घरांचे घरकाम करून संसाराला हातभार लावते. सध्या कोरोनामुळे पतीच्या हातालाही फारसे काम लागत नाही. त्यामुळे मुलांसह सहा जणांच्या कुटुंबाचा गाडा हाकताना दमछाक होत आहे. अनेक घरात रुग्ण आढळतात. अशा घरचे काम बंद होते.

- शेख अफसाना

मागील अनेक वर्षांपासून काम करीत आहे. मुले कामाच्या शोधात बाहेर गेली. तीन ते चार जण येथे राहातो. कोरोनामुळे मागील वर्षभरात पहिल्यांदाच अनेकदा कामावर जाता आले नाही. त्यामुळे आर्थिक अडचणी येत आहे. पुन्हा टाळेबंदी लागली तर खूप अवघड आहे.

- शांताबाई इंगळे

शहरातील मोलकरणींची साधारण संख्या ११५०

शहरातील मोलकरणींच्या हाताला मिळेना काम ३००