महावितरणच्या मंडळ कार्यालयात समन्वय कक्षाची स्थापना

महावितरणच्या हिंगोली मंडल कार्यालयांतर्गत कार्यरत असणाऱ्या अधिकारी, कर्मचारी कोरोनाबाधित असल्यास किंवा राहत्या घरी विलगीकरणाची सोय नसल्यास अशा कर्मचाऱ्यांसाठी मंडळ कार्यालयात दोन कक्षाची स्वतंत्रपणे स्थापना केली आहे.

नांदेड परिमंडळाचे मुख्य अभियंता दत्तात्रय पडळकर यांच्या निर्देशानुसार कोरोनाबाधित कर्मचाऱ्यांच्या सोयीसाठी अधीक्षक अभियंता सुधीर जाधव यांच्या हस्ते गृह विलगीकरण कक्षाची स्थापना करण्यात आली आहे. यावेळी कार्यकारी अभियंता रजनी देशमुख, अतिरिक्त कार्यकारी अभियंता दिनकर पिसे यांच्या उपस्थितीत कोरोनाचा प्रादुर्भाव झालेल्या कर्मचाऱ्यांकरिता विलगीकरण कक्ष खुला करण्यात आला आहे.

या कक्षामध्ये ऑक्सिमीटर, टेंप्रेचर गन, गरम पाणी केटली, वाफ घेण्यासाठी स्टिमर आदी सोयी-सुविधा उपलब्ध करून देण्यात आलेल्या आहेत.

कर्मचाऱ्यांसाठी साधावा संवाद...

कोरोना विषाणूचा संसर्ग झाल्यास अधिकारी महेंद्र बागुल, सहायक महाव्यवस्थापक सुशील पावसकर, वरिष्ठ व्यवस्थापक सुदर्शन कालेवाड या अधिकाऱ्यांशी संपर्क साधावा, असे आवाहनही महावितरणच्या वतीने करण्यात आले आहे.