कलावंतांच्या विविध मागण्यांसाठी निदर्शने

कोरोनामुळे मागील दोन वर्षांपासून विविध कार्यक्रम ठप्प पडले आहेत. त्यामुळे कलावंतांना काम मिळत नाही. परिणामी, उपासमारीची वेळ आल्याने मदतीची मागणी करण्यात आली, तसेच कलावंतांना कायमस्वरूपी मदतीसाठी कलावंत कल्याण मंडळाची स्थापना करावी, कलावंतांच्या पेन्शनसाठी असलेल्या अटी शिथिल कराव्यात, वयोमर्यादा ४५ करावी कालमर्यादा पाच वर्षे करावी, पाच हजारांपेक्षा जास्त पेन्शन द्यावी, कलावंतांच्या समितीवर अनुभवी व्यक्तींची निवड करावी, प्रत्येक गावात सांस्कृतिक भवन आमदार निधीतून उभारावे, कलावंतांना पन्नास हजारापर्यंत मदत द्यावी आदी मागण्या करण्यात आल्या आहेत. निवेदनावर प्रकाश अवचार, संगीता ठोंबरे, शेषराव कावरखे, विठ्ठल गवळी, किसन सुरोशे, राजू पवार, कैलास खरात, राजाराम पवार, रुद्राजी देवकर, विठ्ठल गोरे, शामराव रेणके, लक्ष्मण पाईकराव, बळीराम कानडे, सखाराम कानडे आदींच्या स्वाक्षऱ्या आहेत.

पारंपरिक वेशभूषेत सहभाग

लोककलावंतांनी आपल्या मागण्यांकडे लक्ष वेधण्यासाठी पारंपरिक वेशभूषा केली होती. त्याचबरोबर आंदोलनस्थळी वासुदेवाचे गाणे गोंधळ आदी कलाप्रकार सादर केले. त्यामुळे रस्त्याने ये-जा करणाऱ्यांचे याकडे लक्ष वेधले जात असल्याचे दिसून येत होते.