तिसऱ्या लाटेचे संकट; लहान मुलांचा तापही अंगावर काढू नका!

कोरोनाच्या तिसऱ्या लाटेत लहान मुलांना धोका असल्याचे आधीच सांगितले आहे. यात लसीकरणामुळे काही वर्ग सुरक्षित झाला आहे. तर काही जणांना कोरोना होऊन गेला आहे. शिवाय कोरोनासदृश लक्षणे असल्यास मोठ्यांची कोरोना चाचणी होते. मात्र लहान मुलांच्या चाचणीकडे दुर्लक्ष होते. त्यामुळे त्यांना ताप, सर्दी असल्यास अंगावर न काढता कोरोनाचीही चाचणी करून घेणे गरजेचे आहे.

जिल्ह्यात कोरोनाचे रुग्ण १५९९५

१५ वर्षांखालील रुग्ण ११३८

सर्दी, खोकला व तापाची साथ

हिंगोली जिल्ह्यात सध्या कोरोनाचे प्रमाण कमी असले तरीही रुग्णांमध्ये ताप, सर्दी, खोकला ही लक्षणे आढळत आहेत. त्यातच लहान मुलांमध्ये हे प्रमाण जास्त आहे. त्यातही ताप व डोकेदुखी ही दोन लक्षणे जास्त दिसत आहेत.

ताप आला म्हणजे कोरोना असे नाही पण...

प्रत्येक ताप हा कोरोनाच असतो असे नाही. इतर विषाणूजन्य आजारांतही तापाचीच लक्षणे आढळतात. मात्र कोरोनाची चाचणी केल्यास इतर निदान करणे सोपे जाते.

सध्या ताप, डोकेदुखी, उलटी, जुलाब अशी लक्षणे आढळत असून अनेकांना प्लेटलेटस् कमी झाल्याचे आढळत आहे. काही लक्षणे कोरोनाची दिसत आहेत.

लहान मुलांना आता पूर्वीपेक्षा जास्त बाहेर सोडले जात असल्याने कोरोनासदृश लक्षणे आढळल्यास इतरांना संसर्ग होऊ नये म्हणून तपासणे गरजेचे आहे.

बालकांसाठी कोविड केअर सेंटर

हिंगोली येथील जिल्हा सामान्य रुग्णालयात ५० खाटांची अतिदक्षता बालरुग्णालय उभारले आहे. शिवाय प्रत्येक तालुक्याला १० खाटांचे नियोजन केले आहे. मात्र रुग्णच नसल्याने हे नियोजन अजून प्रत्यक्षात उतरले नाही.

घाबरू नका, काळजी घ्या

सध्या लहान मुलांमध्ये ताप व सर्दीची लक्षणे आढळत आहेत. त्यामुळे घाबरून न जाता आरटीपीसीआर चाचणी केली पाहिजे. त्यामुळे पुढील सदस्या उद्भवणार नाहीत.

-डॉ. गोपाल कदम, बालरोगतज्ज्ञ