corona virus : विलगीकरणात टाकण्याच्या भीतीने तरुणाने रूग्णालयाच्या छतावरून घेतली उडी

corona virus : गंभीर जखमी तरुणावर जिल्हा सामान्य रुग्णालयातील अपघात विभागात उपचार सुरू आहेत.

ठळक मुद्देदोन्ही हात पाय मोडले असून गंभीर जखम झाली आहे.

हिंगोली : जिल्हाधिकारी रुचेश जयवंशी यांनी कोरोना वार्डात रुग्णांच्या नातेवाईकांना येण्यास मनाई केली असून तसे आढळल्यास लिंबाळा येथील विलगीकरण केंद्रात पाठविले जात आहे. आज या भीतीने एका युवकाने रूग्णालयाच्या छतावरून उडी घेऊन आत्महत्येचा प्रयत्न केला.

हिंगोली जिल्हा रुग्णालयात हिंगोली तालुक्यातील समगा येथील वैभव दिवाकर सरकटे वय 24 या युवकाचा नातेवाईक दाखल आहे. गुरुवारी सायंकाळी चारच्या सुमारास जिल्हाधिकारी रुचेश जयवंशी आढावा घेण्यासाठी जिल्हा रुग्णालयात दाखल झाले होते. जिल्हाधिकारी आले की, ते रुग्णांच्या नातेवाईकांना बाहेर काढून विलगीकरण केंद्रात पाठवितात आजही त्यांनी तशा सूचना दिल्या होत्या. त्यामुळे नातेवाईकांची एकच धांदल उडाली अनेक जणांनी लपण्यासाठी जागा शोधण्याचा प्रयत्न केला. मात्र या सर्वांना शोधून विलगीकरण केंद्रात पाठविण्याचा आदेश जयवंशी यांनी दिला. 

मात्र, मला नातेवाईकांसोबत रहायचे असे म्हणून वैभव सरकटे याने दुसऱ्या मजल्यावरून ऑक्सीजन टॅंक नजीकच्या भागात खाली उडी घेतली. यात त्याचे दोन्ही हात पाय मोडले असून गंभीर जखम झाली आहे. डोक्याला इजा झाली आहे. त्याच्यावर जिल्हा सामान्य रुग्णालयातील अपघात विभागात उपचार सुरू आहेत. डॉक्टर मंगेश टेहरे, डॉक्टर कुटे आदी उपचार कार्यात व्यस्त असल्याचे दिसत होते. या रुग्णाची प्रकृती चिंताजनक असून मृत्यूशी झुंज देत आहे. या प्रकारामुळे नातेवाईकांना कोरोना वार्डात प्रवेश देण्याचा मुद्दा चिघळण्याची शक्यता निर्माण झाली आहे.