कोरोना ब्लास्ट; ९३ नवे रुग्ण, एकाचा मृत्यू

आज जिल्हा सामान्य रुग्णालयात दाखल असलेली कळमनुरी येथील ६० वर्षीय वृद्धा कोरोनाने दगावली आहे. त्यामुळे आजपर्यंतच्या मृत्यूचा आकडा ६६ वर पोहोचला आहे. आजपर्यंत कोरोनाचे एकूण ४८४७ रुग्ण आढळून आले आहेत. त्यापैकी ४३६९ जण बरे झाल्यामुळे त्यांना घरी सोडण्यात आले आहे. तर सध्या ४१२ रुग्णांवर उपचार सुरू आहेत. जिल्हा रुग्णालयात दाखल असलेल्यांपैकी ३० जणांची प्रकृती गंभीर असून त्यांना ऑक्सिजनवर ठेवण्यात आले आहे. तर ७ जणांची प्रकृती अतिगंभीर असल्याने त्यांना बायपॅपवर ठेवण्यात आले आहे.

आकडा वाढतच चाललायं

हिंगोलीत नव्याने रुग्ण आढळण्याचे प्रमाण वाढतच चालले आहे. ग्रामीण भागातील रुग्णही मोठ्या संख्येने समोर येत आहेत. त्यामुळे अनेक दिवसांनंतर पुन्हा एकदा एकाच दिवशी विक्रमी ९३ रुग्ण आढळले आहेत. कोरोनाने चांगलेच पाय पसरले असल्याने आता नागरिकांनी अधिक खबरदारी घेणे गरजेचे बनले आहे.

उपायांना तिलांजली दिल्याचा फटका

कोराेना होऊ नये, यासाठी सामाजिक अंतर, मास्क, सॅनिटायझर या उपायांचा आता विसर पडत चालला आहे. शिवाय रुग्णाच्या संपर्कात आल्याचे माहिती असूनही अनेकजण काळजी घेत नसल्याने नंतर अख्खे कुटुंबच बाधित आढळत असल्याचे प्रकार समोर येत आहेत. याकडे नागरिकांनी लक्ष देणे गरजेचे बनले आहे. स्वयंशिस्तच आता कोरोनापासून बचाव करू शकणार आहे.