रुग्णालयात कोविड रुग्णांचे हाल ; बाहेर नातेवाईक बेहाल !

हिंगोली : कोरोनाबाधित रुग्णांना येथील कोविड सेंटरमध्ये उपचारासाठी ठेवले जात आहे. मात्र, रुग्णांना अनेक अडचणींना सामोरे जावे लागत असून बाहेर थांबलेल्या नातेवाइकांचीही गैरसोय होत आहे. कोरोनामुळे शहरातील नातेवाइकांकडेही थांबता येत नसल्याने उघड्यावर रात्र काढावी लागत असल्याचे चित्र आहे.

कोरोनाबाधित रुग्णांची डॉक्टर काळजी घेत असले तरी रुग्णसंख्या वाढत चालली आहे. रुग्णांच्या तुलनेत डॉक्टरांची संख्याही अपुरी असल्याने रुग्णांची देखभाल करताना डॉक्टर, नर्सची धावपळ होत आहे. वैद्यकीय सुविधा वेळेवर मिळत असल्या तरी अनेक रुग्णांचे नातेवाईक जेवणाचा डब्बा, पाणी बॉटल देण्याचा प्रयत्न करीत आहेत. रुग्णाला काही लागल्यास कोणीतरी नातेवाईक जवळ असावा, या उद्देशाने एकादा तरी नातेवाईक रुग्णासोबत येत आहे. मात्र, कोविड सेंटरमध्ये थांबण्यास नातेवाइकांना परवानगी नसल्याने नातेवाइकांना रुग्णालयाच्या बाहेरच थांबावे लागत आहे. सध्या हिंगोली जिल्ह्यात संचारबंदी असल्याने अत्यावश्यक वस्तूंच्या दुकानांशिवाय इतर कोणतीही दुकाने सुरू नाहीत. त्यात हॉटेल बंद असल्याने नातेवाइकांची जेवणावाचून हाल होत आहेत. घरून आणलेली भाकर रात्रीही खाल्ली जात आहे. त्यात उघड्यावर झोपावे लागत असल्याचा आराेपही नातेवाईक करीत आहेत.

नातेवाइकांच्या प्रतिक्रिया...

कोरोनाबाधित रुग्णासोबत आलो आहे. मात्र, कोविड सेंटरमध्ये नातेवाइकांना थांबू दिले जात नसल्याने रुग्णालयाबाहेर थांबावे लागत आहे. जवळ हॉटेलही सुरू नसल्याने रात्रीच्या जेवणाची पंचाईत होत आहे.

- संताेष सरनाईक

कोरोनाबाधित रुग्ण उपचारासाठी दाखल झाला आहे. आतमध्ये आरोग्य सुविधा वेळेवर मिळत असल्या तरी पिण्याचे पाणी, जेवणाचा डब्बा देण्याचा प्रयत्न केला जात आहे. रात्रीला उघड्यावरच थांबावे लागत आहे.

- गणेश साखरे,

हिंगोलीतील हॉटेल बंद असल्याने रात्रीच्या जेवणाची पंचाईत होत आहे. तसेच शहरात नातेवाईक आहेत. मात्र, कोरोनामुळे त्यांच्या घरीही जाता येत नाही. तसेच लॉजही सुरू नसल्याने रात्रीला डासांचा त्रास सहन करावा लागत आहे.

- राजू इंगोले

-