कोरोनातून सावरलेल्या बालकांना 'एमएसआयसी' आजाराचा धोका

हिंगोली : कोरोनातून बरे झाल्यानंतर काही बालकांना एमएसआयसी (मल्टी सिस्टम इन्फ्लेमेटरी सिड्रोम) चा धोका वाढला आहे. जिल्हा रुग्णालयात तीन बालकांवर उपचार करण्यात आले असून यातील दोन बालके बरे झाले, तर एका बालकावर उपचार सुरू असल्याची माहिती रुग्णालयातून देण्यात आली. कोरोनाची तिसरी लाट लहान मुलांसाठी धोकादायक ठरण्याची भीती व्यक्त केली जात आहे.

जिल्ह्यात कोरोनाचे रुग्ण दिवसेंदिवस कमी आढळून येत असले तरी कोरोनाचा धोका अद्याप कमी झालेला नाही. कोरोना संसर्ग टाळण्यासाठी आरोग्य विभागाने लसीकरण मोहीम हाती घेतली आहे. यात १८ वर्षावरील नागरिकांचे लसीकरण होत असले तरी १८ वर्षांखालील बालकांना अद्याप लस देणे सुरू झाले नाही. त्यामुळे लहान मुलांसाठी कोरोनाचा धोका अद्याप कायम आहे. त्यात कोरोना होऊन गेल्यानंतर तीन आठवडे ते एक महिन्यानंतर मुलांमध्ये एमएसआयसी (मल्टी सिस्टम इन्फ्लेमेटरी सिड्रोम) या आजाराची लक्षणे दिसून येत आहेत. त्यामुळे पालकांची चिंता वाढली आहे. जिल्हा रुग्णालयात सध्या एका बालकावर उपचार सुरू असून यापूर्वी दोन बालके बरे झाले आहेत, तसेच बाहेर जिल्ह्यात इतर चार बालकांनी उपचार घेतल्याचे सांगितले जात आहे.

जिल्ह्यात १०३९ बालकांना कोरोना

जिल्ह्यात कोरोना रुग्णांची संख्या १५ हजारांच्यावर आहे. यात १ हजार ३९ लहान बालकांचाही समावेश आहे. यात पहिल्या लाटेत ३३७, तर दुसऱ्या लाटेत ७०२ बालकांना कोरोना झाला. आता तिसरी लाट लहान बालकांसाठी धोकादायक असल्याचे बोलले जात आहे.

ही घ्या काळजी

कोरोना संसर्ग टाळण्यासाठी गर्दीच्या ठिकाणी जाणे टाळावे, तसेच लहान मुलेही गर्दीच्या संपर्कात येणार नाहीत याची काळजी पालकांना घ्यावी लागणार आहे.

आरोग्याची काळजी घेताना लहान बालके नीटनेटके, स्वच्छ कसे राहतील याची काळजी घ्यावी.

-लहान बालकांना स्वच्छ पाणी पिण्यासाठी द्यावे, तसेच दैनंदिन सकस आहार द्यावा.

-घरातून बाहेर पडणाऱ्या घरातील व्यक्तींनी आपण स्वत: सुरक्षित राहिल्यास मुले सुरक्षित राहतील हे लक्षात ठेवून काळजी घ्यावी.

- काही लक्षणे आढळल्यास तत्काळ जवळच्या डॉक्टरांकडे दाखवावे.

बालरोग तज्ज्ञाचा कोट

लहान मुलांची रोग प्रतिकारशक्ती कमी असते. त्यामुळे त्यांना दैनंदिन सकस आहार, पिण्यास शुद्ध पाणी देणे महत्त्वाचे आहे, तसेच

त्यांना गर्दीच्या ठिकाणी नेणे टाळावे. आजाराची लक्षणे आढळल्यास तत्काळ डॉक्टरांना दाखवावे.

- डॉ. दीपक मोरे, बालरोग तज्ज्ञ, जिल्हा सामान्य रुग्णालय, हिंगोली.

कोरोनाचे एकूण रुग्ण - १५९२८

कोरोनावर मात केलेले रुग्ण - १५५१०

जिल्ह्यात एकूण कोरोना मृत्यू - ३८१

उपचार घेत असलेले रुग्ण - ३७