खासगी डॉक्टरांचे रुग्ण ॲंटीजेन तपासणीसाठी बसस्थानकात

हिंगोली : शहरातील काही खासगी डॉक्टर त्यांच्याकडे तपासणीसाठी आलेल्या रुग्णांना रॅपिड ॲंटीजेन तपासणीसाठी बसस्थानकातील आरोग्य पथकाकडे पाठवित आहेत. त्यामुळे प्रवाशांची ॲंटीजेन तपासणी करताना अडथळा निर्माण होत असून खासगी डॉक्टरांनी पाठविलेल्या रुग्णांसोबत वादाचे प्रकार घडत आहेत. या प्रकारामुळे आरोग्य पथकातील कर्मचारी वैतागले आहेत.

जिल्ह्यात कोरोना आजाराने पाय फैलावयास सुरुवात केली आहे. रुग्ण संख्या वाढत असून जिल्हा प्रशासनही विविध उपाययोजना करीत आहे. बाहेर गावाहून, जिल्ह्यातून हिंगोलीत येणाऱ्या प्रवाशांची कोरोना तपासणी करण्यासाठी प्रत्येक बसस्थानकावर आरोग्य पथकांची नियुक्ती करण्यात आली आहे. या पथकात डॉक्टर, आरोग्य कर्मचारी, अंगणवाडी सेविका, आशा वर्कर, एसटी महामंडळाचे कर्मचारी नियुक्त करण्यात आले आहेत. हिंगोलीत उतरणाऱ्या प्रवाशांना अगोदर रॅपीड ॲंटीजेन तपासणी करावी लागत आहे. प्रवाशांची तपासणी केल्यानंतर कोरोना बाधित रुग्ण आढळून येत आहेत. त्यामुळे आरोग्य पथक दिवसभर व्यस्त असते. बसस्थानकात रॅपीड ॲंटीजेन तपासणी केली जात असल्याने याची संधी खासगी डॉक्टरही उचलत आहेत. खासगी डॉक्टरांकडे आलेल्या रुग्णाला ॲंटीजेन तपासणी करून घेण्याचा सल्ला देत बसस्थानकात पाठविले जात आहे. खासगी डॉक्टरांकडील रुग्णांची तपासणी करताना अनेक वेळा आरोग्य पथकातील कर्मचाऱ्यांना वादाला सामोरे जावे लागत आहे. वाद विकोपाला जात असल्याने या ठिकाणी पोलीस कर्मचारी नियुक्त करावा, अशी मागणी आरोग्य पथकातील सदस्यांनी केली आहे.

रविवारी ७ रुग्ण पॉझिटिव्ह

हिंगोली बसस्थानकात रविवारी दुपारपर्यंत २१ प्रवाशांची ॲंटीजेन तपासणी केली असता त्यातील ७ प्रवासी पॉझिटिव्ह निघाले आहेत. या प्रवाशांना उपचारासाठी दवाखान्यात हलविण्यात आले आहे. दरम्यान, या पथकात डॉ. नावेद अतहर, सय्यद इम्रान अली, आर. टी. भोसीर, प्रवीण भालेराव, सुधा सपकाळ, अनिता खंदारे, मुकेश ठोंबरे, अजय मंदाडे आदींचा समावेश आहे.

फोटो : १४