हिंगोली जिल्ह्यातील ८१८ मतदारांचे वय शंभरीपार

हिंगोली : जिल्ह्यात नवीन मतदार यादी पुनरिक्षण कार्यक्रमानंतर तीन विधानसभा मतदारसंघातील मतदारसंख्या ९.२१ लाखांवर पोहोचली आहे. नवमतदारांची संख्या ३० हजारांच्या आसपास पोहोचली असून १०० वर्षे वय पूर्ण केलेल्या मतदारांची संख्या अवघी ८१८ आहे.

हिंगोली जिल्ह्यात मतदार दिवसानिमित्त नवीन मतदारांची नोंदणी करण्यात आली. मतदार नोंदणीचा हा कार्यक्रम नियमितपणे सुरू असतो. त्यात ही नावे मतदार यादीत घेऊन जे मतदार स्थलांतरित झाले अथवा मयत झाले, अशांची नावे वगळण्याची मोहीम नियमितपणे राबविण्यात येते. सर्वाधिक मतदार हे २० ते २९ वर्षे वयाचे असून २.१३ लाख, ३० ते ३९ चे २.०२ लाख, ४० ते ४९ या वयाचे १.७१ लाख, ५० ते ५९ वयाचे १.२९ लाख, ६० ते ६९ वयाचे ८४ हजार, ७० ते ७९ वयाचे ४८ हजार, ८० ते ८९ वयाचे २४ हजार तर ९० ते ९९ वयाचे ६४३२ मतदार आहेत.

यामध्ये नवमतदारांची संख्या जशी वाढली तशीच तरुण मतदारांची संख्याही मोठी असल्याचे दिसून येत आहे. वृद्ध मतदारांची संख्या त्या तुलनेत अतिशय कमी आहे. शिवाय शंभरी पार केलेले तर अवघे ८१८ जण आहेत. तृतीयपंथी मतदारांची नाेंदणीही होत नसल्याचे दिसून येत आहे. एवढ्या मतदारांमध्ये अवघा एक मतदार असून तो ३० ते ३९ वयोगटातील आहे.

जिल्ह्यात ३० हजार नवमतदार

हिंगोली जिल्ह्यात ३० हजारांवर नवमतदार आहेत. या मतदारांपैकी ७ ते ८ हजार मतदारांनी मागील काही काळात नोंदणी केली आहे. प्रत्येक मतदारसंघात १८ ते १९ वर्ष वयाचा हा मतदार जवळपास १० हजारांच्या आसपास आहे. वसमत विधानसभेत पुरुष १.५१ लाख, महिला १.३९ लाख, कळमनुरीत पुरुष १.५९ लाख, महिला १.४४ लाख, हिंगोलीत पुरुष १.६२ लाख तर महिला १.४७ लाख मतदार आहेत.