सेनगाव (जि. हिंगोली): तालुक्यातील सावरखेडा येथील पती-पत्नी गुरुवारी हिंगोली तालुक्यातील घोटादेवी येथील देवीचे दर्शन घेऊन सावरखेडा येथे परतत होते. यादरम्यान त्यांच्या दुचाकीला एका भरधाव ट्रकने उडविले. या अपघातात पती-पत्नीचा जागीच मृत्यू झाला. ही घटना सायंकाळी ७:३० वाजेदरम्यान घडली.
सावरखेडा येथील गणेश शंकर मुडे (वय ४०) व सविता गणेश हे मुडे (वय ३५) हे दोघे जण नवरात्रोत्सवात देवीचे दर्शन घ्यावे म्हणून १० ऑक्टोबर रोजी आपल्या दुचाकीवरून हिंगोली तालुक्यातील घोटादेवी गावाकडे निघाले होते; परंतु सेनगाव ते हिंगोली रस्त्यावर तळणी पाटीजवळ दुचाकीवरून आपल्या गावी सावरखेडाकडे जातेवेळेस पती-पत्नीच्या दुचाकीला हिंगोलीकडे जाणाऱ्या (एमएच ४३ ई २१३७) या भरधाव ट्रकने उडविले. या अपघातात पती-पत्नी जागीच ठार झाले. या अपघातानंतर घटनास्थळी सेनगावचे पोलिस निरीक्षक संतोष तांबे, जमादार सुभाष चव्हाण यांनी भेट देऊन पंचनामा केला. याप्रकरणी अधिक तपास सेनगावचे पोलिस करीत आहेत.