कोरोनाचे नवे १२१ रुग्ण; पाचजणांचा मृत्यू

हिंगोली : जिल्ह्यात रविवारी, ९ मे रोजी कोरोनाचे १२१ नवे रुग्ण आढळले असून, १४२ जण बरे झाल्याने त्यांना घरी सोडण्यात आले आहे. तसेच पाच रुग्णांचा मृत्यू झाल्याची माहिती रुग्णालय प्रशासनाने दिली.

हिंगोली जिल्ह्यात १४२ जणांची रॅपिड अँटिजन चाचणी केली असता सहाजण कोरोनाबाधित आढळले. यात हिंगोली परिसरात ९६ पैकी १, वसमत परिसरात २ पैकी १, सेनगाव १५ पैकी १, औंढा नागनाथ परिसरात २९ पैकी ३ रुग्ण आढळून आले. तसेच आरटीपीसीआर टेस्टमध्ये ११५ नवे रुग्ण आढळले आहेत. यात हिंगोली परिसरातील ५५ रुग्णांचा समावेश आहे. त्यानंतर वसमत परिसरात ८ रुग्ण आढळले असून, कळमनुरी परिसरात १२, औंढा परिसरात २१, सेनगाव परिसरात १९ रुग्ण आढळले. दरम्यान, ९ मे रोजी उपचार घेणारे १४२ रुग्ण बरे झाल्याने त्यांना घरी सोडण्यात आले. जिल्हा रुग्णालयातील ५८ रुग्ण घरी सोडले असून, यात सामान्य रुग्णालयात उपचार घेणारे २८, तर संदर्भित केलेले २० बरे झालेल्या रुग्णांचा समावेश आहे. लिंबाळा कोरोना केअर सेंटरमधील २७, वसमत १२, कळमनुरी ३२, औंढा नागनाथ ९, तर सेनगाव कोरोना केअर सेंटरमध्ये उपचार घेणाऱ्या ४ रुग्णांचा समावेश आहे. हे रुग्ण बरे झाल्याने त्यांना घरी सोडण्यात आले आहे. दरम्यान, आजपर्यंत जिल्ह्यात १४ हजार १८३ रुग्ण आढळले असून, त्यापैकी १३ हजार १९ रुग्ण बरे झाले आहेत. सध्या ८८४ रुग्णांवर उपचार सुरू असून, ४१४ रुग्णांची प्रकृती गंभीर आहे. यातील ३८२ रुग्णांना ऑक्सिजनवर, तर ३२ रुग्णांना बायपॅप मशीनवर ठेवण्यात आल्याची माहिती जिल्हा रुग्णालय प्रशासनाने दिली.

मृत्यूचा आकडा २८० वर

जिल्ह्यात ९ मे रोजी पाच रुग्णांचा मृत्यू झाला. हिंगोली आयसोलेशन वाॅर्डातील ४ रुग्णांचा समावेश असून, यात कंजारा (ता. औंढा ना.) येथील ६५ वर्षीय पुरुष, जलालधाबा (ता. औंढा) येथील ७२ वर्षीय पुरुष, केंद्रा (ता. सेनगाव) येथील ५० वर्षीय महिला, येळी तांडा येथील ७० वर्षीय पुरुषाचा समावेश आहे. तसेच हिंगोली येथील नवीन कोविड हॉस्पिटलमध्ये भोईपुरा (हिंगोली) येथील ६५ वर्षीय पुरुषाचा समावेश आहे. आतापर्यंत कोरोनाने २८० रुग्णांचा मृत्यू झाला आहे.