३०० वॉरियर्सच्या लसीकरणाने होणार शुभारंभ
By लोकमत न्यूज नेटवर्क | Published: January 15, 2021 04:24 AM2021-01-15T04:24:08+5:302021-01-15T04:24:08+5:30
गोंदिया : मागील वर्षभरापासून अवघ्या जगाला हेलावून सोडणाऱ्या कोरोनावर मात करणाऱ्या लसीचे शनिवारपासून (दि. १६) लसीकरण होणार आहे. यांतर्गत, ...
गोंदिया : मागील वर्षभरापासून अवघ्या जगाला हेलावून सोडणाऱ्या कोरोनावर मात करणाऱ्या लसीचे शनिवारपासून (दि. १६) लसीकरण होणार आहे. यांतर्गत, जिल्ह्यात १० हजार २६० लस उपलब्ध झाल्या असून पहिल्या दिवशी जिल्ह्यातील ३ केंद्रांवर ३०० कोरोना फ्रंटलाइन वॉरियर्सचे लसीकरण करून जिल्ह्यात मोहिमेचा शुभारंभ केला जाणार आहे. विशेष म्हणजे, या लसीकरण मोहिमेसाठी आरोग्य विभाग सज्ज आहे.
शनिवारी (दि. १६) कोरोना लसीकरण मोहिमेचा शुभारंभ होत असून त्यादृष्टीने अवघ्या देशातच लसींचे वितरण सुरू करण्यात आले आहे. त्यानुसार, जिल्ह्यात १० हजार २६० लस व सिरिंजचा साठा पोहोचला आहे. सर्वप्रथम आरोग्य अधिकारी-कर्मचाऱ्यांना लसीकरण केले जाणार आहे. जिल्ह्यात ८४२८ फ्रंटलाइन वॉरियर्सची यादी तयार करण्यात आली आहे. या लसीकरणासाठी जिल्ह्यात १४ लसीकरण केंद्रे उभारण्यात आली असली तरी पहिल्या दिवशी शनिवारी येथील गोंदिया वैद्यकीय महाविद्यालय, तिरोडा येथील उपजिल्हा रुग्णालय तसेच देवरी येथील ग्रामीण रुग्णालयात प्रत्येकी १०० म्हणजेच एकूण ३०० फ्रंटलाइन वॉरिर्यसला लसीकरण केले जाणार आहे. जिल्ह्यात लसीकरणासाठी १४ केंद्रांची निर्मिती करण्यात आली असून यामध्ये १० ग्रामीण रुग्णालये, तिरोडा येथील उपजिल्हा रुग्णालय, येथील बाई गंगाबाई रुग्णालय, वैद्यकीय महाविद्यालय तसेच ग्राम खमारी येथील प्राथमिक आरोग्य केंद्राचा समावेश आहे. मात्र पहिल्या दिवशी फक्त केंद्रांवरच लसीकरण केले जाणार आहे.
-----------------------------------
मंगळवार, गुरुवार व शनिवारीच कोरोना लसीकरण
जिल्ह्यात सोमवार, बुधवार व शुक्रवारी बाळांसाठी नियमित लसीकरणाचा कार्यक्रम नियोजित आहे. अशात कोरोनासाठी मंगळवारी, गुरुवारी व शनिवार हे दिवस ठरविण्यात आले आहेत. या लसीकरण मोहिमेचा शुभारंभ शनिवारी (दि. १६) होणार असून त्यानंतर ठरवून दिलेल्या दिवशीच लसीकरण केले जाणार आहे.
--------------------------------
अफवांवर विश्वास ठेवू नका
कोरोनावरील लसीकरणासाठी शनिवारचा दिवस ठरविण्यात आला असून आरोग्य यंत्रणा पूर्णपणे सज्ज आहे. त्यामुळे लस व लसीकरणाला घेऊन अफवांवर विश्वास ठेवू नका.
- डॉ. नितीन कापसे,
जिल्हा आरोग्य अधिकारी, गोंदिया