गोंदिया : अज्ञात वाहनाची दुचाकीला धडक बसून झालेल्या अपघातात एक पोलीस जवान जागीच ठार झाल्याची घटना समोर आली आहे. ही घटना आज (दि. १२) सकाळी आमगाव-देवरी मार्गावर अंजोराजवळ घडली.
विजय फागो उईके (वय ३० रा. भागी, ता. देवरी) असे अपघातात ठार झालेल्या पोलीस जवानाचे नाव आहे. माहितीनुसार, आईआरबी बल १५ बिरसी कॅम्प येथे ड्युटीवर असलेला देवरी (भागी) येथील जवान विजय फागो उईके साप्ताहिक सुटीवर भागी येथे शुक्रवारी गावी आला होता. परिवारासोबत एक दिवस घालवून शनिवारी सकाळी पाच वाजता तो दुचाकीने (एमएच ०४ जेएन ३१३७) बिरसी येथे जाण्यासाठी घरून निघाला. दरम्यान, देवरी-आमगाव रस्त्यावरील अंजोरा गावाजवळ त्याच्या दुचाकीला सामोरून येणाऱ्या वाहनाने धडक दिली, यात त्याचा घटनास्थळीच मृत्यू झाला.
घटनेची माहिती मिळताच आमगाव पोलीस ठाण्याचे पोलीस निरीक्षक विलास नाळे घटनास्थळी दाखल झाले. असून पुढील तपास सुरू आहे. विजय उईके यांच्या पश्चात आई-पत्नी व दोन मुले आहेत. या घटनेमुळे भागी व देवरी येथे शोककळा पसरली होती.