तिरोडा : मासे पकडण्यासाठी तालुक्यातील बोदलकसा जलाशयात गेलेल्या व्यक्तीचा त्यात बुडून मृत्यू झाल्याची घटना बुधवारी (दि.५) घडली. युवराज सुखाराम वरखडे (५५) रा. जिंदाटोला, घोटी असे तलावात बुडून मृत्यू झालेल्या व्यक्तीचे नाव आहे.
प्राप्त माहितीनुसार युवराज वरखडे हे मंगळवारी सायंकाळच्या सुमारास बोदलकसा जलाशयात मासे पकडण्यासाठी गेले. दरम्यात, जलाशयात उतरून मासे पकडत असताना त्यांचा तोल गेल्याने ते जलाशयाच्या पाण्यात बुडाले. याची माहिती गावकऱ्यांना होताच गावातील मासेमारांच्या मदतीने त्यांचा जलाशयात शोध घेण्यात आला. मात्र, रात्र झाल्याने शोध मोहीम थांबविण्यात आली. दरम्यान, बुधवारी(दि.५) सकाळी त्यांचा मृतदेह हाती लागला. तिरोडा पोलिसांनी याप्रकरणी मर्ग दाखल केला आहे. पुढील तपास पोलिस हवालदार नीलकंठ रक्षे व विदेश अंबुले करीत आहेत.