निवडणूक ठरली, 'आघाडी'चे काही ठरेना; विरोधकांमध्ये एकी दिसेना, मतदान आले २० दिवसांवर

झेडपी निवडणुकीच्या निमित्ताने गोवा फॉरवर्ड, काँग्रेस व आरजीमध्ये एकीकडे आघाडीचे चर्चा सुरू आहे.

लोकमत न्यूज नेटवर्क, पणजी : जिल्हा पंचायतीच्या मतदानासाठी अवघे २० दिवस राहिले असताना विरोधी पक्षांच्या नेत्यांची भूमिका कळत नाही. आघाडीची स्वप्ने बघणाऱ्या या पक्षांनी अद्याप उमेदवारच ठरवलेले नाहीत. त्यामुळे अशी दिरंगाई करणाऱ्या पक्षांवर लोक विश्वास ठेवतील का? असा प्रश्न आपचे नेते अॅड. अमित पालेकर यांनी उपस्थित केला. यावेळी त्यांनी आपचे उमेदवार ठरले असून आमचे कामही सुरू झाल्याचे सांगितले.

झेडपी निवडणुकीच्या निमित्ताने गोवा फॉरवर्ड, काँग्रेस व आरजीमध्ये एकीकडे आघाडीचे चर्चा सुरू आहे. तर दुसरीकडे काही नेते एकमेकांवर आरोप करत आहेत. त्यामुळे आघाडी करू पाहणाऱ्या पक्षात गोंधळाचे वातावरण असून ते भाजपला कसा काय घडा शिकवणार? असा प्रश्न पालेकर यांनी उपस्थित केला.

कधी-कधी आघाडी न करता स्वतंत्रपणे लढणे योग्य ठरते. आघाडी म्हणजे परस्पर विश्वास आणि पारदर्शकता असणे महत्त्वाचे आहे. पण सध्याची परिस्थिती पाहता आम्हाला आघाडी करू पाहणाऱ्या नेत्यांची स्पष्ट भूमिकाच दिसत नाही. आघाडी होण्याआधीच बिघाडीचे राजकारण सुरू आहे. त्यामुळे लोकांचा या पक्षांवर किती विश्वास असेल हे सांगता येणार नाही, असेही पालेकर म्हणाले.

'बिघाडी'ची चर्चाच जास्त : अमित पालेकर

पालेकर पुढे म्हणाले, भाजप * सरकारला पराभूत करणे हाच आम आदमी पक्षाचा मुख्य उद्देश आहे. आम्ही राज्यात पर्याय निर्माण करण्यासाठी काम करत आहोत. मात्र, आघाडीतील अनिश्चितता, लांबणारी निर्णय प्रक्रिया हा चिंतेचा विषय आहे. आघाडी करण्यावरच अजून स्पष्टपणे शिक्कामोर्तब झालेला नाही. काही नेते आताच एकमेकांवर टीका करत आहेत. त्यामुळे बिघाडीची चर्चाच जास्त असून पुढील वाटचाल कशी असेल? असा उपरोधीक टोलाही पालेकर यांनी लगावला. आपने उमेदवार जाहीर करून कामही सुरू केले. लोकांचा आपवर पूर्ण विश्वास असल्याचे पालेकर यांनी नमूद केले.