लोकमत न्यूज नेटवर्क, डिचोली : प्रत्येक घरात समृद्धी हा आमचा संकल्प आहे आणि त्यासाठी घरातील प्रत्येकाने आपापल्या परीने कौशल्य विकसित करताना प्रत्येक हाताला काम या माध्यमातून कौशल विकासावर भर देण्याची गरज आहे. माझ्या मतदारसंघातील प्रत्येक कुटुंबाच्या पाठीशी आपण खंबीरपणे उभा आहे. परंतु प्रत्येकाने आपापल्या परीने योगदान देण्यासाठी पुढे यावे, असे आवाहन मुख्यमंत्री डॉ. प्रमोद सावंत यांनी केले.
बूथ चलो अभियान अंतर्गत हरवले पंचायत क्षेत्रातील १५ व १६ बूथ क्रमांकावरील कार्यकर्त्यांशी मुख्यमंत्र्यांनी वैयक्तिकरीत्या भेटून चर्चा केली. त्यांच्या विविध समस्या, त्यांचे विचार तसेच त्यांच्या मनातील विकासाची संकल्पना जाणून घेतली. यावेळी स्थानिक पदाधिकारी, तसेच सरपंच गौरवी नाईक व मान्यवर उपस्थित होते.
प्रत्येक घरापर्यंत विकास ही भाजपची संकल्पना असून, पायाभूत, मूलभूत विकासाबरोबर मानवी विकासावर सरकारचा भर आहे. मात्र, त्याचबरोबर प्रत्येक हाताला काम द्यायचे असेल तर कौशल्य विकसित होणे काळाची गरज आहे. त्यासाठी स्वयंपूर्ण आत्मनिर्भरतेचा ध्यास घेऊन प्रत्येकाने योगदान देण्याचे आवाहन त्यांनी केले. प्रत्येकाच्या स्वप्नांना बळ देण्यासाठी माझे सरकार व वैयक्तिरीत्या माझे सातत्याने प्रयत्न असतील, अशी ग्वाही मुख्यमंत्र्यांनी कार्यकर्त्यांच्या भेटीदरम्यान दिली.
'भिवपाची गरज ना'
डबल इंजिन सरकार तुमच्या पाठीशी खंबीरपणे उभे आहे. त्यामुळे 'भिवपाची गरज ना'. कशाचीही कमतरता नाही, मात्र प्रत्येकाने आपापल्या परीने योगदान देण्यासाठी पुढाकार घ्यावा, असे आवाहन मुख्यमंत्री डॉ. सावंत यांनी कार्यकर्त्यांना केले.