योग शिक्षणाबाबत राज्यात ‘उदासयोग’

पणजी : एनसीईआरटीच्या नवीन पाठ्यपुस्तकात योग शिक्षणाचा सामावेश करण्याची प्रक्रिया सुरू असली, तरी शालेय अभ्यासक्रमात आधीपासूनच समाविष्ट करण्यात आलेल्या योग विषयाची अंमलबजावणी गांभीर्याने करण्यात येत नाही. त्यामुळे नव्याने समाविष्ट केलेल्या योगा विषयाच्या अंमलबजावणीविषयी प्रश्नचिन्हच आहे.
एनसीईआरटीच्या नवीन पाठ्यपुस्तकात योग या विषयाचा समावेश करण्याची प्रक्रिया जवळजवळ पूर्ण झाली आहे. ही पुस्तके लागू झाल्यानंतर त्याची अंमलबजावणी सुरू होईल. २१ जून रोजी जागतिक
योग दिनानिमित्त सांघिक सूर्यनमस्कार घालण्याचा
कार्यक्रम यशस्वी करण्यासाठी क्रीडा खाते व आरोग्य
खाते सक्रिय बनले आहे. त्यासाठी बैठका जोरात चालू आहेत. हा एका दिवसापुरताच विषय राहील की
विद्यालयांत नियमितपणे त्याची अंमलबजावणी होईल, याबद्दल उत्सुकता आहे.
योग शिक्षण हा शारीरिक शिक्षणाचा भाग आहे व विद्यालयातील शारीरिक शिक्षकावर ही जबाबदारी असते. इयत्ता पाचवी ते आठवी आणि नववी ते अकरावीपर्यंतच्या अभ्यासक्रमात योग हा विषय आहे. प्रत्यक्षात याबाबतच्या अंमलबजावणीविषयी ना शिक्षण खात्याला माहिती आहे ना शालान्त मंडळाला. मंडळाचे अध्यक्ष जे. आर. रिबेलो यांना विचारले असता ते म्हणाले की, नववी ते अकरावीपर्यंतच्या अभ्यासक्रमात योग शिक्षण आहे. काही माध्यमिक व उच्च माध्यमिक विद्यालयांत त्याची अंमलबजावणी केली जाते; परंतु बऱ्याच ठिकाणी ती होत नाही.
पाचवी ते आठवीपर्यंत असलेल्या योग अभ्यासक्रमाचीही तीच स्थिती आहे. गोवा शिक्षण खात्यालाही याविषयी सविस्तर माहिती नाही. अभ्यासक्रमात सामाविष्ट केला असला, तरी प्रत्यक्ष परीक्षेच्या दृष्टीने योग हा विषय महत्त्वाचा नसल्यामुळे त्याच्या अंमलबजावणीवर परिणाम झाला आहे. (प्रतिनिधी)