पार्से येथील तरुणी अपघातात जागीच ठार

पेडणे : भाईडवाडा-कोरगाव येथे शुक्रवारी सायंकाळी पावणेसहाच्या सुमारास झालेल्या अपघातात मधलावाडा-पार्से येथील स्वाती सुहास कांबळी (वय २२) ही जागीच ठार झाली. मोटारसायकल चालक प्रज्योत कशालकर- सरमळे, पेडणे (३०) हा जखमी झाला. पेडणे पोलिसांनी सांगितले की मांद्रे ते म्हापसा व्हाया भाईडवाडा-कोरगाव-तुये मार्गे जाणारी (जीए०१ एक्स ०४) कदंब बस शुक्रवारी सायंकाळी ५.४५ वा. भाईडवाडा येथील वळणावर आली असता समोरून तुये येथून या बुलेट मोटारसायकलवरून (जीए ०३ एए ७३७२) प्रज्योत व त्याच्यामागे बसलेली स्वाती भाईडवाडाच्या दिशेने जात होते. समोरून अचानक बस आल्याने भांबावलेल्या मोटारसायकल चालकाने जोरात ब्रेक दाबला असता मागे बसलेली तरुणी रस्त्यावर फेकली गेली. त्याचवेळी कदंबचे मागचे चाक तिच्या डोक्यावरून गेल्याने ती जागीच ठार झाली. कदंबचालक ज्ञानेश्वर गोविंद परब (तोरसे) याला अकट केली आहे.