लॅम्बर्ट मास्कारेन्हास यांना ‘गोमंत विभूषण’

पणजी : ज्येष्ठ गोमंतकीय पत्रकार, लेखक व स्वातंत्र्यसैनिक लॅम्बर्ट मास्कारेन्हास यांना राज्य सरकारच्या कला व संस्कृती खात्याने गुरुवारी २०१३-१४ सालचा ‘गोमंत विभूषण’ हा गोव्यातील सर्वोच्च पुरस्कार जाहीर केला. रोख रुपये पाच लाख, शाल, श्रीफळ, स्मृतिचिन्ह व गौरवलेख असे या पुरस्काराचे स्वरूप आहे. कला व संस्कृती खात्याचे मंत्री दयानंद मांद्रेकर यांनी गुरुवारी सचिवालयात घेतलेल्या पत्रकार परिषदेत मास्कारेन्हास यांच्या नावाची घोषणा केली. गानसम्राज्ञी लता मंगेशकर, किशोरी आमोणकर अशी चार-पाच नावे या पुरस्कारासाठी सुचविण्यात आली होती. तथापि, मास्कारेन्हास हे गोव्यात राहात असल्याने गोमंतकीय रहिवाशालाच प्राधान्य द्यावे, असा विचार आम्ही केला व मास्कारेन्हास यांच्या नावाची निवड केली, असे मांद्रेकर यांनी स्पष्ट केले. मुख्यमंत्र्यांच्या अध्यक्षतेखालील समितीसमोर आलेल्या नावांवर विचार केला गेला व मास्कारेन्हास यांच्या नावावर शिक्कामोर्तब केले गेले. यापूर्वी शास्त्रज्ञ डॉ. अनिल काकोडकर, डॉ. रघुनाथ माशेलकर, वास्तुरचनाकार चार्ल्स कुरैय्या यांना ‘गोमंत विभूषण’ पुरस्कार प्राप्त झाला आहे. प्रथमच एका पत्रकाराला हा पुरस्कार जाहीर झाला आहे. जगभरात अनेक गोमंतकीय राहतात. त्यांनी कला व अन्य क्षेत्रांत खूप योगदान दिले आहे व खूप पैसाही कमावला आहे; पण जी व्यक्ती गोव्यातच राहते, त्या व्यक्तीला ‘गोमंत विभूषण’साठी प्राधान्य देण्याचा प्रयत्न आम्ही करू, असे मंत्री मांद्रेकर यांनी सांगितले. मास्कारेन्हास यांनी आता वयाची शंभरी गाठली आहे. येत्या सप्टेंबरमध्ये त्यांच्या वाढदिनीच त्यांना पुरस्कार वितरित करण्याचा प्रयत्न आहे. (खास प्रतिनिधी)