पणजी : गोव्यात एटीएम मनिशला स्कीमर बसवून विविध बँकांमधील ग्राहकांच्या खात्यांवरील आॅनलाईन सिस्टीम हॅक करून ग्राहकांचे पैसे लंपास करणा-या आंतरराष्ट्रीय रॅकेटचा पेडणे पोलिसांनी पदार्फाश केला. पोलिसांनी सलग तीन दिवस संशयितांचा आंतरराज्य पाठलाग करत संशयित आरोपी पीरजोल एननॉईल (४०), सिपोस वासिले लॉर्डियन (३७) यांच्या मुसक्या कोल्हापुरात आवळल्या. बुधवारी पेडणे शहरात या संशयितांनी ग्राहकांच्या अडीच लाख रुपयांवर डल्ला मारला होता. दोघा रुमानियन हॅकर्सना शनिवारी पेडणे पोलिसांनी शाहूपुरी पोलिसांच्या मदतीने रात्री अटक केली.
या दोघांकून रोख ७ लाख १८ हजार ५४०, कार, दोन लॅपटॉप, पाच मोबाइल, सात एटीएम कार्ड, अमेरिका, इंग्लंड, मोरोक्को, रुमानिया इतर देशांच्या चलनी नोटा, नाणी व पासपोर्ट, रोख पैसे काढलेली स्लिप्स असा सुमारे २० लाखांचा मुद्देमाल जप्त केला. पीरजोल व सिपोस यांचे चांगले प्रस्तापित संपर्क असून यापूर्वीही जुलैमध्ये या संशयितांना गोवा पोलिसांनी अशाच आॅनलाईन स्कीमर चोरी प्रकरणात अटक केली होती, अशी माहिती पोलिसांनी दिली.
‘संशयितांनी कळंगुटमधून एका खासगी एजन्सीकडून ‘रेंट अ कार’ घेतली होती. मात्र, त्या मालकाने त्याच्याकडून कोणतीच कागदपत्रे घेतली नव्हती. शिवाय हे दोघेही हडफडे येथील हॉटेममध्ये राहत होते तिथे सुद्धा त्यांच्याकडून सी फार्म भरून घेतला नव्हता. त्यामुळे संशयितांचा पाठलाग व तपास करण्यास उशिर झाल्याची माहिती पोलीस निरीक्षक चोडणकर यांनी दिली.’ संशियतांनी विविध बँकांचा डेटा चोरण्यासाठी काही इलेक्ट्रॉनिक उपकरणे बनवून एटीएम कार्ड्सव्दारे ग्राहकांचे पैसे लंपास करायचे, असेही चोडणकर यांनी सांगितले.
गोवा राज्यातील पेडणे पोलीस ठाण्याच्या हद्दीमध्ये २७ सप्टेंबर रोजी एटीएम मशीनला स्कीमर बसवून बँकेतील ग्राहकांच्या खात्यावरील रोकड आॅनलाईनव्दारे परस्पर लुटलाच्या पाच तक्रारी दाखल झाल्याने पेडणे पोलीस चक्रावून गेले होते. २८ सप्टेंबरला पेडणे पोलीस ठाण्याचे उपनिरीक्षक सागर धातकर हे रात्रगस्तीवर असताना त्यांना खेणीर येथील एसबीआय बँकेच्या एटीएममध्ये एक विदेशी नागरिक काहीतरी करीत असल्याचे दिसले. बाहेर लाल रंगाच्या स्विफ्ट कारमध्ये दुसरा विदेशी नागरिक बसलेला दिसला. त्यांचा संशय आल्याने धातकर गाडीतून उतरताना पोलिसांची चाहूल लागताच एटीएममधील विदेशी नागरिक धावत कारमध्ये बसून भरधाव वेगाने निघून गेले. त्यांचा पाठलाग केला असता, ते सापडले नाही. त्यांनी याविषयी गोवा पोलीस नियंत्रण कक्षातून ही माहिती पुणे, मुंबई एअरपोर्टवर कळविली.
दोघे परदेशी नागरिक पुणे-मुंबईला न जाता गगनबावडामार्गे कोल्हापूरला आले. पोलिसांनी कारच्या क्रमांकावरून मालकाचा शोध घेतला व संशयितांचे मोबाईल क्रमांक मिळविले. त्यांचे लोकेशन तपासले असता, ते कोल्हापुरातील एका पंचतारांकित हॉटेलवर उतरल्याचे समजले. त्यानुसार पोलीस निरीक्षक संदेश चोडणकर यांनी संशयितांचे सीसीटीव्ही फुटेज व फोटो पाठवून कोल्हापूर पोलिसांनी सावध केले. दरम्यान, कोल्हापुरातील शाहूपुरी पोलीस ठाण्याच्या हद्दीमध्ये उतरलेल्या दोघा परदेशी नागकिरांना पोलिसांनी ताब्यात घेऊन अटक केली.