मूलचेरा (गडचिरोली) : तालुक्यातील लगाम ते शांतिग्रामदरम्यान दामपूर वळणाजवळ एका दुचाकीला लोहखनिज पोहोचवून परत येणाऱ्या ट्रकने धडक दिल्याने एक महिला ठार झाली. यामुळे संतप्त गावकऱ्यांनी एकापाठोपाठ येणारे आठ ट्रक पेटवून देण्याची घटना मंगळवारी सायंकाळी ४.४५ वाजेच्या सुमारास घडली.
लगाम येथील आठवडी बाजार असल्याने येथे परिसरातील गावांमधील लोकांची वर्दळ होती. यादरम्यान घुग्गुस येथे लोहदगड पोहोचवून आष्टीकडून परत सुरजागडकडे निघालेल्या रिकाम्या ट्रकपैकी एका ट्रकची (एमएच ३४, बीजी ८३८८) विरुद्ध दिशेने येणाऱ्या दुचाकीला धडक बसली. यात कांचनपूर येथील पती-पत्नी खाली पडले. त्यातील अंजली सुभाष जयधर (३८ वर्षे) या महिलेच्या डोक्याला जबर मार लागल्याने तिचा घटनास्थळीच मृत्यू झाला.
...अन् जमावाने केले उभ्या ट्रकांना लक्ष्य
- या अपघातानंतर मार्गावरील वाहतूक बंद होती. त्या ठिकाणी लोकांनी एकच गर्दी केली. काही वेळातच त्यांनी रस्त्यालगत उभ्या असलेल्या ८ ट्रकला लक्ष्य करीत पेटवून दिले. रात्रीपर्यंत ट्रक जळत होते.
- सध्या आष्टी ते आलापल्ली या राष्ट्रीय महामार्गाची चांगलीच दुरवस्था झाली आहे. त्यामुळे सर्वच वाहनांचे अपघात वाढले आहेत. सध्या या मार्गावरील वाहतूक बंद असून आष्टी-मूलचेरा-आलापल्ली अशी वाहतूक वळविली आहे.