गडचिरोली : महाराष्ट्र पोलीस दलाच्यावतीने २ जानेवारीपासून जागृती सप्ताहाचे आयोजन करण्यात आले आहे. सदर सप्ताह ८ जानेवारीपर्यंत चालणार आहे. या सप्ताहाचा एक भाग म्हणून शनिवारी शहर पोलीस ठाण्यात शहरातील अनेक शाळांच्या विद्यार्थ्यांनी पोलीस प्रणालीविषयी माहिती जाणून घेतली. यात विद्यार्थ्यांनी शस्त्रास्त्र, स्फोटके, डॉगस्कॉड, ब्रिग्रेड, स्टेशन डायरी, वायरलेस यंत्रणा याविषयी माहिती जाणून घेतली. पोलीस ठाण्यात पार पडलेल्या कार्यक्रमाला उपविभागीय पोलीस अधिकारी डॉ. राहुल खाडे, पोलीस निरीक्षक उमेश बेसरकर, पोलीस उपनिरीक्षक अंकुश माने, दिंडुरे, गांगलवार, मुनगेलवार, वाहतूक शाखेचे पोलीस उपनिरीक्षक प्रशांत कांबळे, पवन पाटील, विजय कुळमेथे उपस्थित होते.यावेळी विद्यार्थ्यांना डॉगस्कॉड तसेच श्वान पथकातील कुत्र्यांच्या प्रकाराविषयी माहिती देण्यात आली. त्यानंतर ठाणेदार बेसरकर यांनी विद्यार्थ्यांना शस्त्रास्त्रांच्या प्रकाराविषयी तसेच इतर माहिती दिली. दरम्यान विद्यार्थ्यांना वायरलेस यंत्रणा, स्टेशन डायरी, एफआयआर, पोलीस वाहन याविषयी माहिती देण्यात आली. सप्ताहादरम्यान जिल्ह्यातील प्रत्येक पोलीस ठाण्याअंतर्गत जनजागृती, सुरक्षेसंदर्भात व्याख्यान, कार्यशाळा, सुरक्षेविषयी माहिती, समूपदेशन कार्यशाळा आदी कार्यक्रमांचे आयोजन करण्यात आले आहे. कार्यक्रमात विद्यार्थ्यांनी पोलीस ठाण्यातील क्राईम विभाग, गोपनीय शाखा, सीसीटीएनएस, हॅन्डग्रीनेड याविषयी माहिती जाणून घेतली. विद्यार्थ्यांनी पोलीस यंत्रणेला न घाबरता पोलिसांना सहकार्य करण्याची वृत्ती अंगी बानवावी, तसेच व्यक्तिमत्व विकासावर भर द्यावा, असे आवाहन डॉ. राहुल खाडे यांनी केले. कार्यक्रमात शिवाजी महाविद्यालय, शिवाजी सायन्स कॉलेज, कारमेल हायस्कूल येथील विद्यार्थी सहभागी झाले होते. त्याबरोबरच शिक्षक एम. जे. पदा, आर. एस. करकाडे उपस्थित होते.
विद्यार्थ्यांनी जाणली पोलीस प्रणाली
By admin | Updated: January 3, 2015 23:03 IST