Maharashtra Election 2019 ; प्रचारसभांचा धुराळा उठणार शेवटच्या टप्प्यात

जिल्ह्यातील तीनही मतदार संघात निवडणूक रिंगणात असलेल्या ३७ उमेदवारांमध्ये बहुतांश उमेदवार अपक्ष आहेत. त्यातही अनेक जण पहिल्यांदाच निवडणुकीच्या रिंगणात उतरलेले आहेत. त्यामुळे आपल्या मतदार संघातील गावे पिंजून काढताना त्यांची चांगलीच दमछाक होत आहे. अपक्षांच्या प्रचारासाठी कोणत्याही नेत्यांची सभा होणार नसल्यामुळे त्यांचा आपल्या स्तरावर प्रचार सुरू आहे.

ठळक मुद्देउमेदवारांचा जनसंपर्कच येणार कामात : प्रशिक्षणाच्या सत्रांमधून प्रशासकीय यंत्रणेची तयारी पूर्णत्वाकडे

लोकमत न्यूज नेटवर्कगडचिरोली : विधानसभा निवडणुकीच्या प्रचारासाठी आता अवघा आठवडाभर शिल्लक आहे, पण अद्याप तरी मोठ्या नेत्यांच्या प्रचारसभांचा धुराळा उठण्यास वेग आलेला नाही. काही अपवाद सोडल्यास अद्याप मोठ्या नेत्यांच्या सभांचे नियोजन झाले नसल्याने सध्यातरी उमेदवारांची मदार वैयक्तिक जनसंपर्क आणि मतदारांमध्ये आपली प्रतिमा उजळ करण्यावरच आहे. हाती असलेल्या मोजक्या दिवसात कोण आपली प्रतिमा अधिक उजळवतो यावरच त्यांचा खेळ अवलंबून राहणार आहे.जिल्ह्यातील तीनही मतदार संघात निवडणूक रिंगणात असलेल्या ३७ उमेदवारांमध्ये बहुतांश उमेदवार अपक्ष आहेत. त्यातही अनेक जण पहिल्यांदाच निवडणुकीच्या रिंगणात उतरलेले आहेत. त्यामुळे आपल्या मतदार संघातील गावे पिंजून काढताना त्यांची चांगलीच दमछाक होत आहे. अपक्षांच्या प्रचारासाठी कोणत्याही नेत्यांची सभा होणार नसल्यामुळे त्यांचा आपल्या स्तरावर प्रचार सुरू आहे. परंतू प्रमुख पक्षीय उमेदवारांना आपल्या बाजुने वातावरण निर्मिती करण्यासाठी राज्य आणि राष्ट्रीय पातळीवरील नेत्यांच्या सभांची प्रतीक्षा लागली आहे.प्राप्त माहितीनुसार, जिल्ह्यात भाजप किंवा काँग्रेसच्या राष्ट्रीय पातळीवर नेत्यांची सभा होण्याची शक्यता नसल्याची माहिती सुत्रांनी दिली. मात्र राज्य पातळीवरील स्टार प्रचारकांच्या सभा पुढील आठवड्यात होणार आहेत. वंचित बहुजन आघाडीचे नेते अ‍ॅड.प्रकाश आंबेडकर यांनी गुरूवारी गडचिरोलीत तर शुक्रवारी अहेरीत सभा घेऊन जाहीर सभा घेतल्या. याशिवाय अर्थमंत्री सुधीर मुनगंटीवार यांच्याही सभा लवकरच होणार आहेत. काँग्रेसचे केंद्रीय नेते मुकूल वासनिक शनिवारी गडचिरोलीत काँग्रेस प्रमुख कार्यकर्त्यांची बैठक घेणार असल्याचे जिल्हाध्यक्ष डॉ.नामदेव उसेंडी यांनी सांगितले. मात्र काँग्रेस नेत्यांच्या जाहीर सभांचे नियोजन अद्याप झालेले नाही.दरम्यान प्रशासकीय यंत्रणेकडून निवडणूक प्रक्रिया यशस्वीपणे पार पाडण्यासाठी संबंधित कर्मचाऱ्यांचे प्रशिक्षण सत्र सुरू आहे. गडचिरोली, अहेरी आणि आरमोरीत हे प्रशिक्षण सुरू असून बाहेरून आलेले आयोगाचे निरीक्षक प्रत्येक गोष्टीवर नजर ठेवून आहेत.निवडणुकीत ड्युटी आणि प्रशिक्षणामुळे अनेक कार्यालयातील कामकाज मात्र प्रभावित झाले आहे.आतापर्यंत पकडली ७ लाखांची रक्कमनिवडणूक आचारसंहिता लागू झाल्यापासून ठिकठिकाणी तपासणी नाके आणि भरारी पथकांकडून वाहनांची तपासणी केली जात आहे. त्यात अनधिकृतपणे होणाºया रोख रकमेच्या वाहतुकीला आळा घालण्याचा प्रयत्न प्रशासकीय यंत्रणेकडून केला जात आहे. त्यात आतापर्यंत अहेरी आणि गडचिरोली मतदार संघात प्रत्येकी ३ कारवायांमध्ये ७ लाखांपेक्षा अधिक रक्कम पकडण्यात आली. जिल्हा खर्च नियंत्रण समितीने संबंधितांचे बयाण घेऊन पडताळणी केल्यानंतर त्यापैकी ४ ठिकाणी पकडलेली ४ लाखांची रक्कम परत केली, पण दोन ठिकाणची ३ लाख १७ हजार रुपयांची रक्कम अजून जप्त असून त्याबाबतची चौकशी सुरू आहे. जिल्ह्यात आतापर्यंत कोणावरही आचारसंहिता भंग झाल्याप्रकरणी गुन्हा दाखल करण्यात आलेला नाही.उमेदवाराच्या अपहरण प्रकरणातील आरोपी फरारआरमोरी मतदार संघातील अपक्ष उमेदवार तथा माजी पंचायत समिती सभापती बगुजी ताडाम यांच्या अपहरण आणि निवडणूक प्रचारास मनाई प्रकरणी गुन्हे दाखल असलेले काँग्रेसचे उमेदवार, माजी आमदार आनंदराव गेडाम त्यांचे पूत्र लॉरेन्स आणि इतर सर्व आरोपी गायब असल्याचे पोलिसांनी सांगितले. या प्रकरणातील सर्व आरोपींवर भादंवि कलम १७१ क, १४३, १४७, १४९, ३२३, ३४१, ३४२, ३६५, ३९२, ५०६, सहकलम १३५ अन्वये गुन्हे दाखल आहेत. अटकपूर्व जामिनासाठी ते प्रयत्नशिल असल्याची माहिती सूत्रांनी दिली. ऐन निवडणूक प्रचाराच्या काळात हे संकट ओढवल्याने गेडाम अडचणीत सापडले आहे. विशेष म्हणजे शुक्रवारी आरमोरीत त्यांच्या प्रचार कार्यालयाच्या उद्घाटनालाही ते उपस्थित नव्हते. अखेर जिल्हाध्यक्षांच्या हस्ते उद्घाटनाची औपचारिकता पार पाडण्यात आली.