चामोर्शी : तहसील कार्यालयातून गावी परतण्यासाठी दुचाकीवरून निघालेल्या चौघांना सुरजागडच्या लोहखनिज वाहतूक करणाऱ्या ट्रकने चिरडल्याची घटना २५ सप्टेंबरला घडली होती. यात एकाच कुटुंबातील तिघांचा दुर्दैवी अंत झाला तर एकावर उपचार सुरू आहेत.
दरम्यान, तिन्ही मृतांवर मार्कंडा येथील वैनगंगा नदीकाठावर २६ सप्टेंबरला दुपारी अंत्यसंस्कार करण्यात आले. नातेवाइकांच्या आक्रोशाने गावकऱ्यांच्या अश्रूंचा बांध फुटला. मार्कंडा येथील जनध्यालवार कुटुंबातील चौघे जण तहसील कार्यालयात कामानिमित्त गेले होते. आटोपल्यावर चौघे काम दुचाकीवरून (एमएच ३३ - के ३१३५) परत निघाले, गडचिरोली रोडवर सुरजागडहून आलेल्या भरधाव ट्रकने (सीजी ०८ एयू २०४५) त्यांना चिरडले. यात प्रियंका गणेश जनध्यालवार (२४), रुद्र गणेश जनध्यालवार (५) व भावना नरेंद्र जनध्यालवार (४५) हे तिघे ठार झाले तर नरेंद्र जनध्यालवार (५२) हे जखमी आहेत. तीन आठवड्यांपूर्वीच जनध्यालवार कुटुंबातील गणेश यांचा मृत्यू झाला होता. या दुःखातून कुटुंब सावरलेही नव्हते तोच त्यांचा मुलगा रुद्र व पत्नी प्रियंका यांचाही दुर्दैवी मृत्यू झाला. दरम्यान, उत्तरीय तपासणीनंतर तिन्ही मृतदेह नातेवाइकांकडे देण्यात आले.