पोलीस जवानासह तिघे गंभीर : देसाईगंज-आरमोरी मार्गावरील पेपरमील नजीकची घटनादेसाईगंज : आजारी आईच्या भेटीसाठी कुटुंबीयांसह जात असलेल्या पोलिसाच्या मोटारसायकलला मद्यधुंद बीएसएफ जवानाने जबर धडक दिल्याने तीन जणांना गंभीर दुखापत झाल्याची घटना शुक्रवारी दुपारी ३.१५ वाजताच्या सुमारास देसाईगंज-आरमोरी मार्गावरील जेजानी पेपरमील जवळच्या अवतार सिमेंट प्रॉडक्टसमोर घडली.देसाईगंज पोलीस ठाण्यात कार्यरत सतीश खरकाटे हे आपल्या एम. एच. ३३ आर. ६६१५ या मोटारसायकलने पत्नी अस्मिता (३९), मूलगी शर्वरी (९) व शरयू (३) यांच्यासह आजारी आईच्या भेटीसाठी आरमोरीला जात होते. जेजानी पेपरमिल जवळच्या अवतार सिमेंट प्रॉडक्टसमोर पोहचताच मागून मद्यधूंद अवस्थेत भरधाव वेगाने येत असलेल्या बीएसएफ जवानाने खरकाटे यांच्या मोटारसायकलला जोरदार धडक दिली. यात सतीश खरकाटे यांच्या पायाला गंभीर दुखापत झाली. बीएसएफ जवान मंगेश मडावी (३०) तसेच त्याच्या मागे बसलेला नरेंद्र वझाडे (४०) दोघेही रा.जोगीसाखरा हेदेखील गंभीर जखमी झाले. त्यांच्यावर देसाईगंज येथील ग्रामीण रुग्णालयात प्रथमोपचार करुन त्यांना गड़चिरोलीला हलविण्यात आले. सतीश खरकाटे यांची पत्नी अस्मिता खरकाटे, मुलगी शर्वरी खरखाटे व शरयू खरकाटे यांना किरकोळ मार लागला. (तालुका प्रतिनिधी)
बीएसएफ जवानाची दुचाकीला धडक
By admin | Updated: January 28, 2017 01:17 IST