"मी आणि जमील साहेब मिळून पाकिस्तान..."; रिझवानने सांगितली 'धुरंधर २'च्या पुढची कहाणी, वाचून चकीत व्हाल

पाकिस्तानात भारतीय एजंट म्हणून काम करणाऱ्या जमील जमाली आणि रिझवानचं काय होईल? हा प्रश्न सर्वांना पडला आहे. अखेर याविषयी सिनेमात रिझवानची भूमिका साकारणाऱ्या अभिनेत्याने खुलासा केला आहे.

'धुरंधर २' सिनेमाची सध्या चांगलीच चर्चा आहे. 'धुरंधर' आणि 'धुरंधर २' मिळून दोन्ही सिनेमांनी २००० कोटींची कमाई केली आहे. 'धुरंधर २'च्या शेवटी दिसलं पाकिस्तानात भारतीय एजंट म्हणून काम करणारा हमजा नंतर भारतात येतो. पुढे कथा कशी वळण घेईल? पाकिस्तानातच भारतीय एजंट म्हणून काम करणाऱ्या जमील जमाली आणि रिझवानचं काय होईल? हा प्रश्न सर्वांना पडला आहे. अखेर याविषयी सिनेमात रिझवानची भूमिका साकारणाऱ्या अभिनेत्याने खुलासा केला आहे.

हमजा 'किंग ऑफ लियारी' बनल्यानंतर रिझवान त्याचा सर्वात विश्वासू साथीदार बनतो. मात्र, जेव्हा हमजाची खरी ओळख उघड होते, तेव्हा त्याला भारतात परतणे भाग पडते आणि रिझवान तिथे एकटा पडतो. हमजाच्या अनुपस्थितीत आता रिझवान पुढे काय करणार, असा प्रश्न चाहत्यांना पडला आहे.

यावर इंस्टाग्रामवरील एका 'आस्क मी एनीथिंग' सेशनमध्ये रिझवानची भूमिका साकारणाऱ्या मुस्तफा अहमदने भाष्य केले आहे. तो म्हणाला, "मला वाटते की रिझवान तिथूनच सुरुवात करेल जिथे हमजा सोडून गेला होता. रिझवानची खरी ओळख अजून कोणालाच माहित नाही आणि तो आधीच खूप चांगल्या स्थितीत आहे. तो उरलेल्या शत्रूंना संपवत सहज पुढे जाऊ शकतो. त्याच्यामध्ये तशी ताकद नक्कीच आहे."

चाहत्यांमध्ये अशीही चर्चा आहे की, रिझवान आता जमील जमाली (राकेश बेदी यांची भूमिका) सोबत हातमिळवणी करू शकतो. जमील हा देखील पाकिस्तानच्या राजकारणात दडलेला एक भारतीय एजंट आहे. या शक्यतेवर मुस्तफाने मिश्किल टिप्पणी करत म्हटले, "नक्कीच! मी आणि जमील साहेब मिळून पाकिस्तान सांभाळू शकतो. आणि खरं सांगायचं तर, तिथल्या नेत्यांपेक्षा आम्ही अधिक चांगल्या पद्धतीने आणि त्यांच्याच फायद्यासाठी काम करू.", अशाप्रकारे मुस्तफाने 'धुरंधर २' नंतरचं कथानक पुढे कसं वळण घेईल, हे सांगितलं आहे.