हॉल सजवायचाय हटके मग बीडसचे पडदे लावा! हे 5 प्रकारचे पडदे घराला एकदम ट्रेन्डी बनवतात!

असंख्य डिझाईन्समध्ये उपलब्ध असणाऱ्या बीडसच्या पडद्यांमुळे आपलं घर उठून दिसलं नाही तरच नवल!

 

-सारिका पूरकर-गुजराथी

घरातील दरवाजे, खिडक्यांना पडदे लावायचे म्हटले की आपल्या डोळ्यासमोर येतात ते सिल्क, कॉटन, नेट फेब्रिकचे आकर्षक रंगातील, विविध डिझाईन्सचे पडदे. मात्र पडद्यांची ही संकल्पना थोडी बदलून पाहण्याची वेळ आली आहे. कारण अ‍ॅक्रेलिक बीड्स, लाकडी बीड्स, बांबू बीड्स, प्लॅस्टिक बीड्स, हातानं विणलेले वायरीचे गोफ यांचे पडदे बाजारात उपलब्ध आहे. हे पडदे दिसायला तर सुंदर दिसतात शिवाय एक क्लासिक लूकही सजावटीला देतात. असंख्य डिझाईन्समध्ये उपलब्ध असणाऱ्या या पडद्यांमुळे आपलं घर उठून दिसलं नाही तरच नवल!

 

घर सजावटीसाठी बीडसचे पडदे कसे निवडाल?

१) घराचा हॉल जर मोठा असेल तर सोफ्याच्या मागच्या बाजूला हे पडदे लावून तुम्हाला पार्टिशन करता येईल. सोफ्यामागे हे पडदे लावताना तुम्हाला भिंतीचा आधार नसेल तेव्हा छतावर रॉड टांगून त्यावर हे पडदे अरेंज करता येतात. यात सहसा सुती धाग्यांच्या (फक्त दोरीच्या स्वरूपातील लडी) पडद्यांचा वापर केला तर छान दिसतात. लाकडी बीड्स टे्रण्डी फील देतात.