-सारिका पूरकर-गुजराथीसेरेना विल्यम्स. स्टेफी ग्राफचा २२ ग्रॅण्डस्लॅमचा विक्रम मोडून टेनिस जगतात आपला दबदबा निर्माण करणारी आंतरराष्ट्रीय ख्यातीची नंबर वन टेनिसपटू. तिला टेनिस सम्राज्ञी म्हणनंच जास्त संयुक्तिक. सेरेना ओळखली जाते ते तिच्या झंझावातामुळे . टेनिस कोर्टवरील झंझावातानं जगप्रसिध्द झालेली ही टेनिसपटू हल्ली तिच्या खाजगी आयुष्यातल्या एका घटनेने भलतीच चर्चेत आली आहे. सेरेनाची यामुळेही एक वेगळी ओळख जगाला झालीय. एक धडाकेबाज खेळाडूसोबतच स्वतंंत्र बाण्याची स्त्री म्हणून सेरेना सध्या चर्चेत आहे. दोन महिन्यांची गरोदर असतानाही आॅस्ट्रेलियन ओपनमध्ये ती खेळली. नुसतीच खेळली नाही तर जेतेपदही पटकावलं. साहजिकच गर्भारपणाचा बाऊ न करता ते सक्षमपणे पेलण्याचा, सांभाळण्याचा आणि यात कुठेही स्वत:चं अस्तित्त्व विसरु नका हा संदेशच तिनं दिला आहे. देऊ केला आहे.
आता यापुढे जाऊन तिनं नुकतंच एका मॅगझिनच्या कव्हरसाठी तिच्या बेबी बम्पसह न्यूड फोटोशूट केलंय . बेबी बम्प दाखवण्याचा एक नवा पायंडा सेरेनानं घालून दिला आहे. हल्ली सेलिब्रेटिंच्या जगात बेबी बम्प दाखवण्याची नवी फॅशन रूढ झाली आहे. सेरेनाचं बेबी बम्प फोटो शूट हे या फॅशनमधलं बोल्ड पाऊल. पूर्वी गर्भवती असल्याचं कळलं की आघाडीच्या अभिनेत्री, खेळाडू किंवा अन्य सेलिब्रिटी महिला कॅमेऱ्यासमोर येण्याचं धाडस करत नसत. का ? तर या काळात वजन वाढलेलं असतं. शरीर बेढब दिसतं. प्रेक्षक चाहत्यात स्लिम अॅण्ड ट्रिम अंदाजातल्या आपल्या इमेजला याअवस्थेतील बेढबपणामुळे धक्का लागू नये याची काळजी त्या आग्रहपूर्वक घ्यायच्या. आता मात्र जमाना सेलिब्रेटींच्या जगातला जमाना बदललाय. त्यांच्यातील आई होऊ पाहणारी स्त्री खऱ्या अर्थानं फुलू लागलीय. होय, कारण गर्भारपणाचा ‘मातृत्वाचा आनंद’ या पलीकडे जाऊन त्या विचार करु लागल्या आहेत. तो विचार हाच आहे की, ‘कोणत्याही वयात, कोणत्याही टप्प्यावर आपले शरीर जसं असतं तसे ते स्वीकारा, त्याच्यावर प्रेम करा, त्याचा आदर करा.’
सेरेना विल्यम्सच नाही तर आपल्याकडे सेलिना जेटली हिनंही बिकिनी घालून नुकतंच असं फोटोशूट केलंय. सेलिना पुन्हा जुळ्यांना जन्म देणार आहे. यापूर्वी कोंकणा सेन, श्वेता साळवे, तारा शर्मा, लिसा हेडन, मंदिरा बेदी यांनी खास बेबी बम्पचं फोटोशूट करुन सोशल मीडियावर ते शेअर केलेय. जेनेलिया डिसुझा, अर्पिता शर्मा,सोहा अली खान, मीरा राजपूत यांनीही बेबी बम्पसह फोटोशूट केले. करिना कपूरनं तर गर्भारपणाची व्याख्याच बदलून टाकली. ‘मी गर्भवती आहे, आजारी नाही’ असं म्हणून तिनं संपूर्ण नऊ महिने कोठेही गर्भारपण न लपवता काम केलं. गर्भावस्थेतली फॅशन एस्टाबलिश करणारे फॅशन शोजचं तिनं प्रतिनिधित्व केलं.एकेकाळी सेलिब्रिटींचं गर्भारपण ही अत्यंत गोपनीय बाब होती. माधुरी दीक्षित, श्रीदेवी यांना कधी पाहिलत का आपण गर्भारपणात ? नाही ना? कारण त्या काळातील सेलिब्रेटींचं गर्भारपण ही बाब खासगीपेक्षा त्याच्या सौंदर्याला बाधा आणू पाहणारी म्हणून बघितली जात होती. आज मात्र चित्र एकदम बदललं आहे. या सुखद क्षणांचा अभिमान म्हणून सर्वच सेलिब्रेटी आता गर्भारपणही सोशल करु लागल्या आहेत.
भारतात बेबी बम्प फोटोशूट आत्ताआत्ता सेलिब्रेटी धाडसानं करताना दिसताहेत. अमेरिकन अभिनेत्री डेमी मूर हिनं मात्र १९९१ मध्येच बेबी बम्पसह न्यूड फोटोशूट करुन एक नवा विचार रूजवू पाहिला होता. त्यानंतर ब्रिटनी स्पिअर ( २००६), मिरांडा केर (२०१० ), जेसिका सिम्पसन ( २०११ ) यांनीही असे फोटोशूट करुन डेमीला पाठिंबा दिला होता. आता सेरेनानं असं फोटोशूट केल्यानंतर साहजिकच या फोटोशूटला अधिक ग्लॅमर आणि महत्व प्राप्त झालंय. कारण या अभिनेत्रींपेक्षा सेरेना टेनिसच्या माध्यमातून जगभरात पोहोचली आहे. साहजिकच तिच्या या फोटोशूटनं सर्वच महिला सेलिब्रेटी, प्रसारमाध्यमं, व्यावसायिक छायाचित्रकारांना गर्भवती महिलांचं सौंदर्य नव्यानं समजून घेण्यात मदतच होणार आहे. गर्भवती असताना बाळाच्या वाढीनुसार वाढणारा पोटाचा आकार आता चिंतेचं, लज्जेचं आणि संकोचाचं विशेषत: लपवण्याचं कारण नाही तर आनंदाचं, अभिमानाचं कारण असणार आहे. गर्भावस्थेत आपण कसे दिसतोय? या प्रश्नाला आता कायमचाच पूर्णविराम मिळेल. बेबीमून, बेबी बम्प फोटोेशूट हे नवे ट्रेण्ड भारतातही सेट होताय. एरवी गर्भवती अभिनेत्रीची एक झलक कॅमेऱ्यात बंदिस्त करण्यासाठी छायाचित्रकार धडपडत असत आता तर त्या स्वत:हूनच कॅमेऱ्यासमोर येताहेत. सेलिब्रेटींमधल्या या धाडसी स्त्रीचं म्हणूनच जगालाही कौतुक वाटतं.