>> संजय आवटे
चिंचवड मतदारसंघ राखण्यात भाजपला यश आलं हे खरं, पण त्यासाठी त्यांची दमछाक झाली. पोटनिवडणूक असूनही अत्यंत चुरशीची अशी ही लढत होती. चिंचवडचे दिवंगत आमदार लक्ष्मण जगताप हे प्रभावी आणि शक्तिशाली नेते. जगताप हे अजित पवारांच्या जवळचे. ते भाजपमध्ये गेले आणि देवेंद्र फडणवीसांचे 'खास' झाले. जगतापांच्या निधनानंतर त्यांच्या पत्नीला, अश्विनी यांना भाजपने उमेदवारी दिली. कारण, जगतापांविषयी काही प्रमाणात असलेल्या सहानुभूतीचा फायदा भाजपला घ्यायचा होता.
'ही निवडणूक बिनविरोध होणार नाही', हे अजित पवारांनी सर्वप्रथम जाहीर केले, ते 'लोकमत'च्या व्यासपीठावरच. पिंपरी-चिंचवड आणि अजित पवार हे खास नाते आहे. मागच्या महापालिका निवडणुकीतील पराभव अजित पवारांच्या जिव्हारी लागला आहे. महाविकास आघाडी सरकार कोसळल्यानंतरची ही पहिली निवडणूक होती. त्यामुळे वचपा काढण्याची ही चांगली संधी होती. इथे अजित पवारांचा दबदबा आहे. त्यांनी ही निवडणूक व्यक्तिशः हातात घेतली.
मात्र, राहुल कलाटे यांच्या उमेदवारीने चित्र बदललं. महाविकास आघाडीने एकच उमेदवार द्यावा, अशी व्यूहरचना होती. तसे घडले नाही. कलाटे हे शिवसेनेचे. गेल्या निवडणुकीत त्यांनी लाखाहून अधिक मते घेतली होती. मात्र, तेव्हा राष्ट्रवादी कॉंग्रेसचा कलाटेंना पाठिंबा होता. यावेळी 'राष्ट्रवादी'चे उमेदवार नाना काटे होते, तर राहुल कलाटे अपक्ष होते. 'वंचित'ने कलाटेंना पाठिंबा दिला. कलाटेंमुळे भाजपचा विजय पक्का झाला. मतांचे विभाजन झाले. शिवाय 'कुजबुज कॅम्पेन' चालले.
शिवसेनेचा पाठिंबा कलाटेंनाच आहे, अशी अफवा पसरली. उद्धव ठाकरे स्वतः आले असते, तर चित्र बदलले असते. आदित्य आले, पण त्यांनी कलाटेंविषयी भाष्य केले नाही. दुसरे म्हणजे, जगताप आणि अजित पवार यांचा स्नेह जुना. त्यामुळे अजित पवारांचाच जगतापांना छुपा पाठिंबा आहे, अशी कुजबुजही होती. अजित पवारांनी निवडणूक हातात घेतली. 'राष्ट्रवादी'च्या केडरनेही जोरकस काम केले. पण, मतविभाजनाचा फटका बसला. स्थलांतरित उच्चवर्गीय मतदार भाजपसोबत होता. जगतापांचे वलय होतेच. भाजपनेही ताकदीने काम केले. शिवाय, कुजबुज कॅम्पेन. त्यामुळे अर्थातच भाजपला हा मतदारसंघ राखता आला आणि 'राष्ट्रवादी'ची एक संधी गेली.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"