डॉ. मिहीर बापट स्पाइन सर्जन, नानावटी हॉस्पिटल
मी कॉलेजजीवनात गायचो. त्यामुळे ती आवड पूर्वीपासूनच होती. आमच्या बँडमधील काही मित्र हे माझ्या बॅचचे आहेत. त्यामुळे त्यांचे कलागुण आम्हाला माहीत होतेच. कालांतराने आम्ही काहीजण एकमेकांचे मित्र झालो. त्यानंतर आम्ही या विषयावर गप्पा मारायचो, सादरीकरण करायचो. विशेष म्हणजे आम्ही सहाही जण स्पाइन सर्जन आहोत, मुंबईतील नामांकित रुग्णालयांशी संलग्न आहेत. वर्षभरापूर्वीच आम्ही आमच्या बँडचे नाव निश्चित केले, ते म्हणजे द कॉर्ड्स. संगीतात ‘कॉर्ड्स’ म्हणजे एकाच वेळी वाजवले जाणारे दोन किंवा अधिक सूर (नोट्स). जेव्हा हे सूर एकत्र वाजवले जातात, तेव्हा त्यातून एक विशिष्ट संगीतात्मक प्रभाव तयार होतो. तसेच आम्ही सगळे स्पाइन सर्जन स्पायनल कॉर्डवर काम करत असतो. आपल्या शरीरातील एक अत्यंत महत्त्वाचा मज्जासंस्थेचा भाग, जो मेंदूला आपल्या शरीराच्या इतर भागांशी जोडण्याचे काम करतो, यावरून आमच्या बँडचे नाव ठरले.
आमच्या या बँडमध्ये, डॉ. अरविंद कुलकर्णी तबला वाजवतात, डॉ. अभय नेने आणि डॉ. अभिलाष एन. ध्रुव गिटार हाताळतात. डॉ. संभव शाह ड्रम्स वाजवतात, डॉ. अमित शर्मा सॅक्सोफोन वाजवतात आणि मी गातो. ‘द कॉर्ड्स’ बँडने अनेक वैद्यकीय परिषदांमध्ये सादरीकरण केले आहे. प्रत्येक परफॉर्मन्सनंतर आमच्यातील आत्मविश्वास वाढत आहे. आमचे कुटुंबीय आणि मित्र यांची आम्हाला चांगली साथ मिळत आहे. २० वर्षांपेक्षा अधिक काळ आम्ही आमच्या क्षेत्रात काम केले आहे. आता थोडा वेळ बँडस्ला देणार आहोत. छोट्या मैफिली गाजविल्यानंतर ‘द कॉर्ड्स बँड’ ऑक्टोबरमध्ये असोसिएशन ऑफ स्पाइन सर्जन्स ऑफ इंडिया यांच्या परिषदेत लोअर परळ येथील एका पंचतारांकित हॉटेलमध्ये परफॉर्म करणार आहे. विशेष पहिल्यांदाच १००० पेक्षा अधिक डॉक्टरांसमोर आम्ही आमची कला सादर करणार आहोत. या दीड तास चालणाऱ्या शोसाठी आम्ही वेळ काढून प्रॅक्टिसही करत आहोत.
स्पाइन सर्जरी म्हटले म्हणजे त्यात अधिक ताण असतो. मात्र संगीत थेरपी ही एक नैसर्गिक आणि प्रभावी उपचारपद्धती आहे जी मानसिक, शारीरिक आणि भावनिक आरोग्य सुधारण्यासाठी वापरली जाते. संशोधनानुसार, संगीत ऐकण्यामुळे मन शांत होते, तणाव कमी होतो आणि रुग्णाचे रक्तदाब, हृदयगती नियंत्रित राहते.
सध्या आम्ही आमची कला सादर करत राहणार आहोत. लोकांचा प्रतिसाद बघून यावरून पुढचे शो करायचे की नाही, याचा निर्णय आम्ही सगळे मित्र मिळून घेऊ. सध्या तरी आमच्या बँडमध्ये आम्हीच आहोत. तसेच लाइटिंग, साउंडसाठी आम्ही त्या क्षेत्रातील तज्ज्ञांची मदत घेत असतो.