स्टेशन भागातील भाजीपाला बाजाराचे केले अन्यत्र स्थलांतर

दोंडाईचा : दोंडाईचा शहरात कोरोना विषाणू संसर्ग वाढत असल्याने शासन व प्रशासन विविध उपाययोजना करीत आहे. स्टेशन भागातील भाजीपाला बाजारात ग्राहकांचा होणाऱ्या गर्दीतून कोरोनाचा संसर्ग वाढू शकतो. कोरोना संसर्ग रोखण्याचा पार्श्वभूमीवर दोंडाईचा नगरपालिकेने स्टेशन भागातील भाजीपाला-फळे विक्रेत्यांना दुसऱ्या जागी स्थलांतरित केले आहे. उद्या, सोमवारपासून या विक्रेत्यांना नवीन जागेवर जाणे बंधनकारक आहे. जुन्या जागी विक्री करणाऱ्या विरोधात कारवाई करण्याचा इशारा प्रशासनाने दिला आहे.

स्टेशन भागात लोटगाडीवर फळे-भाजीपाला विक्रेते विक्री करतात. त्या ठिकाणी वाहनांची कोंडी होते. मधल्या भागात भाजीपाला विक्री होत असून, तो भाग अरुंद आहे. जवळजवळ लोटगाड्या लावल्याने या भागात ग्राहकांची खूपच गर्दी होऊन जाते. सोशल डिस्टन्स अजिबात ठेवले जात नाही. अनेक विक्रेते मास्क लावतच नाही, बरेच ग्राहक बिना मास्क भाजीपाला बाजारात फिरत असतात. या सर्वाधिक गर्दीच्या ठिकाणी कोरोना संसर्ग मोठ्या प्रमाणात होण्याची भीती निर्माण झाली आहे.

कोरोना विषाणू संसर्ग रोखण्यासाठी नगराध्यक्षा नयनकुवर रावल यांच्या मार्गदर्शनाखाली दोंडाईचा नगरपालिका विविध उपाययोजना करीत आहे. नगरपालिका प्रशासन, नगरसेवक, शहरातील जाणकार नागरिक यांचा नियोजनातून भाजीपाला व फळ विक्रेते यांना नवीन जागा देण्यात आली आहे. आप्पासाहेब ग्राऊंडला सदर बाजार स्थलांतरित करण्यात आला असून, भाजीपाला-फळ विक्रेते यांचा सोशल डिस्टन्ससाठी मार्किंग करण्यात आले आहे.

नवीन जागेत भाजीपाला व फळे घेण्यासाठी ग्राहकांनी यावे. विक्रेते व ग्राहक यांनी आपले व शहराचे आरोग्य अबाधित ठेवण्यासाठी याच जागी डिमार्क नुसार, विशिष्ट अंतर ठेवून विक्रेत्यांनी विक्री व ग्राहकांनी खरेदी करावी, असे आवाहन नगराध्यक्षा नयनकुवर रावल, अपर तहसीलदार सुदाम महाजन, मुख्याधिकारी डॉ. प्रवीण निकम, उपमुख्याधिकारी हर्षल भामरे, पोलीस निरीक्षक दुर्गेश तिवारी यांनी केले आहे.