धुळे : नागपूर सुरत राष्ट्रीय महामार्गावर काळखेडा शिवारात झालेल्या बस- दुचाकीची धडकेत एक तर पिंपळनेरनजीक शेलबारी घाटात ट्रॅक्टरने दिलेल्या धडकेत आणखी एक असे दोनजण ठार झाल्याची घटना घडली. दोन्ही अपघाताच्या घटनेनंतर चालकाने पळ काढला आहे. दोन्ही अपघाताची नोंद पोलीस दप्तरी करण्यात आली आहे.
काळखेडा शिवारास बसच्या धडकेत एकजण ठार
भुसावळकडून वसईच्या दिशेने जाणारी राज्य परिवहन महामंडळाची एमएच १४ -बीटी ३९८८ क्रमांकाची बस नागपूर पारोळ्याकडून धुळ्याच्या दिशेने येत होती. त्याचवेळेसे समोरुन येणाऱ्या दुचाकीला (क्र. एमएच १८ एएस ५०९२ ) बसने जोरदार धडक दिली. या अपघातात शरद पंडित बोरसे (कोळी) (४०, रा. बाळापूर, ता. धुळे) हा तरुण जागीच ठार झाला. अपघाताची ही घटना फागणे ते मुकटी दरम्यान काळखेडा शिवारात रविवारी सकाळी साडेनऊ ते पावणे दहा वाजेच्या सुमारास घडला. अपघातानंतर बसचालकाने पळ काढला. घटना लक्षात येताच गंभीर जखमी अवस्थेत शरद बोरसे याला तातडीने हिरे वैद्यकीय महाविद्यालयात दाखल करण्यात आले असता डॉक्टरांनी तपासून मयत घोषित केले. मयत झालेला शरद बोरसे हा खासगी ठेकेदाराकडे काम करायचा. सुवालाल पाटील यांनी दिलेल्या माहितीवरून अपघाताची नोंद धुळे तालुका पोलीस ठाण्यात करण्यात आली.
शेलबारी घाटातील घटना
ताहाराबादकडून पिंपळनेर गावाकडे येणाऱ्या दुचाकीला सटाणा रोडवरील शेलबारी घाटात ट्रॅक्टरची जोरदार धडक बसली. ही घटना शुक्रवारी ६ वाजेच्या सुमारास घडली. यात बापू सुभाष गायकवाड (३९) आणि बाळू गोविंदा बागुल (२३) या दोघांना दुखापत झाली. त्यांना पिंपळनेर ग्रामीण रुग्णालयात दाखल करण्यात आले. बापू गायकवाड यांचा मृत्यू झाला. अपघातानंतर ट्रॅक्टर चालक ट्रॅक्टर सोडून पळून गेला आहे. पिंपळनेर पोलीस ठाण्यात सुरूपसिंग मोतीराम चौरे यांनी दिलेल्या तक्रारीवरून अपघाताची नोंद करण्यात आली.