रूग्णालयात जागा नाही, कोविड सेंटरही फुल्ल

कोरोना बाधित रुग्णांवर उपचार करण्यासाठी शहरात खासगी व सरकारीसह एकूण ३२ रुग्णालये आहेत. ही सर्व रुग्णालये मिळून एकूण १ हजार ६०६ बेड असून, रविवारपर्यंत १२५६ बेड फुल्ल असून, केवळ ३५० बेड रिकामे होते.

दरम्यान, दिवसेंदिवस कोरोनाबाधित रुग्णांची संख्या वाढत आहे. त्यामुळे रिकामे असलेले बेडही तत्काळ फुल्ल होऊन जात आहे. कोरोनाची बाधा झाल्याबरोबरच नातेवाईकांची रुग्णालयांमध्ये बेड मिळविण्यासाठी धावपळ सुरू होत असते. पैसे मोजूनही काही ठिकाणी बेड, ॲाक्सिजन मिळत नसल्याची नातेवाईकांची तक्रार आहे.

कोविड सेंटरमध्येही लवकर बेड मिळेना

रुग्णाचा अहवाल पॅाझिटिव्ह आल्यानंतर ज्याच्याजवळ पैसे आहे ते खासगी रुग्णालयात जात आहेत. मात्र सर्वसामान्य परिस्थिती असलेल्यांना कोविड सेंटरचाच आधार आहे. मात्र त्या ठिकाणीही लवकर बेड मिळत नाही.

रुग्णांना सौम्य लक्षणे तरीही रुग्णालयात

अहवाल पॅाझिटिव्ह आल्यानंतर ज्यांना कोरोनाची सौम्य लक्षणे आहेत, त्यांना घरीच विलगीकरणात राहण्याच्या सूचना प्रशासनातर्फे देण्यात येतात. मात्र काहीजण उपचार रुग्णालयातच झाले पाहिजे म्हणून रुग्णालयांमध्ये धाव घेत आहेत. तसेच काही ठिकाणी घरे लहान व विलगीकरणासाठी स्वतंत्र जागा नसल्याने, नाईलाजास्तव रुग्णांना रुग्णालय अथवा कोविड सेंटरमध्ये दाखल व्हावे लागत आहे. एकाचवेळी शहरातील शंभर, दीडशे जणांचे अहवाल पॅाझिटिव्ह येत असून, हे सर्वजण रुग्णालयात धाव घेतात.

रुग्णांची बेड मिळविण्यासाठी वणवण

बाधित रुग्ण आढळून आल्यानंतर त्याला खासगी अथवा शासकीय रुग्णालयात बेड मिळविण्यासाठी नातेवाईकांची धावपळ सुरू होते. अनेक ठिकाणी फोन करूनही बेड नसल्याचेच सुरवातीला सांगण्यात येत असते. यातच रुग्णाच्या नातेवाईकांचा बराच वेळ वाया जात असतो.