मालपूर येथे सारीचे रुग्ण शोधमोहीम

१६ एप्रिलपासून ‘माझं कुटुंब, माझी जबाबदारी’ हे अभियान आशा स्वयंसेविका, अंगणवाडी सेविका व शिक्षक यांच्या गावनिहाय टीम बनवून सुरू करण्यात आले असून सदरील टीम पुढील १४ दिवस गावात सर्वेक्षण करून ईली व सारीचे सर्दी, ताप, खोकला लक्षणे असलेली संशयित कोरोना रुग्ण शोधतील जेणेकरून त्यांचे वेळेवर निदान होऊन त्यांना लवकर उपचाराखाली घेणे शक्य होणार आहे.

सदर सर्वेक्षण अंतर्गत संशयितांची ऑक्सिजन पातळी व थर्मल गनद्वारे तपमान मोजणी करण्यात येणार आहे.

तसेच दुर्धर आजाराचे रुग्ण व ६० वर्षावरील सर्व व्यक्तींना कोरोना विरोधात प्रतिकारशक्ती वाढविण्यासाठी व्हिटॅमिन डी ३ व झिंकच्या गोळ्या आशा स्वयंसेविका यांच्या माध्यमातून वाटण्यात येणार आहेत.

‘ब्रेक द चेन’ अभियान अंतर्गत सदरील मोहीम मुख्य कार्यकारी अधिकारी श्रीमती वनमती व जिल्हा आरोग्य अधिकारी डॉ. संतोष नवले यांच्या आदेशानुसार राबविण्यात येत असल्याचे येथील प्रा. आ. केंद्राचे वैद्यकीय अधिकारी डॉ. हितेंद्र पाटील यांनी सांगितले.