लायसन्सची मुदत संपली, अपॉईंटमेंट घेतलीय का ?

धुळे - अनलॉक झाल्यानंतर लायन्सन्सचे नूतनीकरण करण्यासाठी गर्दी वाढली आहे. मात्र लायसन्स नूतनीकरणासाठी परवानगी घेणे आवश्यक आहे. परवानगी घेतली असेल तरच नूतनीकरण केले जात आहे.

कोरोनाच्या दुसऱ्या लाटेने सर्वानाच घरी थांबायला भाग पाडले होते. आता निर्बंध उठवण्यात आल्याने मागील दोन महिन्यांपासून रखडलेली कामे मार्गी लावण्यासाठी नागरिक घराबाहेर पडत आहेत. त्याचप्रकारे अनेकांच्या वाहन लायसन्सची मुदत संपली आहे. पण ते लायसन्स नूतनीकरण करू शकले नव्हते. त्यासाठी आरटीओ कार्यालयात नागरिकांची गर्दी होत आहे. पण लायसन्सचे नूतनीकरण करण्यासाठी परवानगी घेणे आवश्यक असून ऑनलाईन अर्ज करावा असे आवाहन आरटीओ कार्यालयाने केले आहे. कोरोना अजून पूर्णपणे संपलेला नाही यासाठी अशी खबरदारी घेण्यात येत आहे. गर्दी वाढली तर पुन्हा कोरोनाचा उद्रेक होऊ शकतो. तसेच लर्निंग लायसन्स साठी आता आरटीओ कार्यालयात जायची गरज नाही. ते आता घरबसल्या मिळवता येणार आहे. ऑनलाईन परीक्षा होऊन लर्निंग लायसन्स मिळणार आहे.

अशी घ्या अपॉइंटमेंट -

लायसन्सची मुदत संपली असेल तर नूतनीकरण करण्यासाठी आता परवानगी घ्यावी लागणार आहे. त्यासाठी ऑनलाईन पद्धतीने अर्ज करावा लागेल. कागदपत्रे अपलोड करावे लागतील व ज्यादिवशी बोलावले जाईल तेव्हा कार्यालयात जावे लागणार आहे. कोरोनाचा प्रादुर्भाव वाढू नये यासाठी कार्यालयाकडून खबरदारी घेतली जात आहे.

लर्निंग घरी मिळणार -

लर्निंग लायसन्स आता घरबसल्या मिळणार आहे. त्यासाठी आरटीओ कार्यालयात जायची आवश्यकता नाही. घरीच ऑनलाईन परीक्षा देता येईल. परीक्षा पास झाल्यानंतर लायसन्स मिळणार आहे. कागदपत्रे ऑनलाईन पद्धतीनेच अपलोड करावे लागणार आहेत. यापूर्वी ही परीक्षा आरटीओ कार्यालयात जाऊन द्यावी लागत होती.

दररोज ६० वाहनांची नोंदणी -

लॉकडाऊनचे नियम शिथिल झाल्यानंतर दररोज ५० ते ६० वाहनांची नोंदणी होत असल्याची माहिती मिळाली. लॉकडाउनच्या काळात देखील कोरोना प्रतिबंधात्मक नियमांचे पालन करून कार्यालयातील कामकाज सुरु होते. त्यामुळे निर्बंध हटवल्यानंतर कामाचा ताण वाढला नसल्याची माहिती मिळाली. सोबतच कुंदाने येथे वाहन प्रात्यक्षिक परीक्षाही सुरु झाली आहे.

प्रतिक्रिया

ऑनलाईन अर्ज करा -

लायसन्सच्या नूतनीकरणासाठी प्रथम ऑनलाईन पद्धतीने अर्ज करणे बंधनकारक आहे. कोरोनाचा प्रादुर्भाव वाढू नये यासाठी थेट संपर्क टाळता यावा यासाठी हा निर्णय घेतला आहे. त्याला चांगला प्रतिसाद मिळत आहे. वाहन प्रात्यक्षिक परीक्षाही सुरु झाली आहे. तसेच दोन ते तीन दिवसानंतर लर्निंग लायसन्स घरबसल्या मिळणार आहे.

- राहुल कदम, सहा. उपप्रादेशिक परिवहन अधिकारी