ग्रामीण रुग्णांसाठी कोविड सेंटर

लोकमत न्यूज नेटवर्क

धुळे : येथील जिल्हा रुग्णालय आणि हिरे वैद्यकीय महाविद्यालयावरील ताण कमी करण्यासाठी ग्रामीण भागातील रुग्णांकरिता स्वतंत्र कोविड केअर सेंटर सुरू करण्याचा निर्णय प्रशासनाने घेतला आहे. त्यानुसार ग्रामीण भागासाठी कुसुंबा, आर्वी आणि बाफना काॅलेजमध्ये कोविड सेंटर सुरू करण्यात आले आहे. मुकटी आणि सोनगिर येथेही सेंटर सुरू होणार आहे. शहरासह ग्रामीण भागात कोरोनाचा संसर्ग वाढल्याने ग्रामीण भागातील रुग्णांसाठी आरोग्य विभागाने तीन कोविड केअर सेंटर सुरू केली आहेत. बाफना कोविड केअर सेंटरमध्ये ऑक्सिजन बेडची व्यवस्था करण्यात येत आहे. त्यासाठी पाइपलाइन टाकण्याचे काम सुरू आहे. ग्रामीण भागातील रुग्णांना जिल्हा रुग्णालय किंवा हिरे रुग्णालयात दाखल केले जात होते. कोरोनाच्या दुसऱ्या लाटेत बाधितांची संख्या वाढल्याने ग्रामीण भागातील रुग्णांसाठी गावाजवळ उपचाराची सोय करण्यात आली. त्यानुसार आर्वी आणि कुसुंबा येथे प्रत्येकी ३० खाटांचे कोविड केअर सेंटर सुरू झाले आहे. तसेच धुळे शहरात बाफना काॅलेजमध्येदेखील ग्रामीण रुग्णांसाठी सेंटर कार्यान्वित होणार आहे. या सेंटरची क्षमता ५०पेक्षा अधिक बेडची असणार आहे.

नव्याने सुरू झालेल्या आणि लवकरच सुरू होणाऱ्या या सेंटरमध्ये लक्षणे नसलेल्या आणि साैम्य लक्षणे असलेल्या रुग्णांवर उपचार होणार आहेत. लामकानी येथेही कोविड सेंटर प्रस्तावित असल्याचे सांगण्यात आले. जिल्हा परिषदेच्या आरोग्य विभागातर्फे सेंटर सुरू झाल्याने शहरातील तसेच ग्रामीण भागातील सरकारी दवाखान्यांवरील ताण कमी होणार आहे. रुग्णांचीही गावाजवळच सोय होईल. शहरात बेडसाठी वेटिंग सुरू आहे.