जावयाने केला सासऱ्याच्या भाच्याचा खून

धुळे : काैटुंबिक वादातून जावयाने सासऱ्याच्या भाच्याचा विळ्याने वार करून निर्घृण खून केल्याची घटना धुळे तालुक्यातील जापी शिवारात बुधवारी सकाळी ८ वाजेच्या सुमारास घडली. सासरचे नातेवाईक पत्नीचे दुसरीकडे लग्न लावून देण्याचा प्रयत्न करीत असल्याचा संशय आल्याने पतीने हा खून केला. जापी शिवारात कापडणे पाटचारी लगत युवराज निंबा ठाकरे यांच्या शेतात हा खून झाला. राजेंद्र रामसिंग बारेला (३२, रा. चाळीसगाव जि. जळगाव) असे मयताचे नाव असून, काशिराम चिखल बारेला-पावरा (रा. हटवाडी, पानसेेमल, मध्यप्रदेश) असे आरोपीचे नाव आहे.

धुळे तालुक्यातील वणी येथे राहणाऱ्या केवलसिंह पावरा याच्या लहान मुलीचे शनिवारी लग्न होते. या लग्नासाठी केवलसिंहचे भाऊ, बहीण, भाचे, नातेवाईक तसेच मोठा जावई काशिराम पावरा असे सर्व नातेवाईक आले होते. लग्न झाल्यानंतर काशिराम निघून गेला. परंतु तो रविवारी पुन्हा परत आला आणि जापी शिवारात केवलसिंहच्या भावाकडे मुक्कामी थांबला. काशिराम पावरा वादविवाद करीत असल्याने केवलसिंह वणीला परत गेला. दरम्यान, बुधवारी सकाळी काशिरामला घेण्यासाठी केवलसिंहचा मुलगा आणि चाळीसगाव येथील भाचा राजेंद्र रामसिंह बारेला हे दोघे आले होते. तिघे जण पायी जात असताना जापी ते बिलाडी रोडवर त्यांच्यात वाद झाला. त्यावेळी काशिराम पावरा याने दोघांवर हल्ला करून विळ्याने वार केले. त्यात मानेवर आणि पोटात विळा घुसल्याने राजेंद्रचा जागीच मृत्यू झाला. केवलसिंहचा मुलगा सुटका करण्यात यशस्वी झाल्याने तो बचावला. त्यानंतर मारेकरी काशिराम पावरा फरार झाला.

दरम्यान, या गुन्ह्याची माहिती मिळताच तालुका पोलीस स्टेशनचे पोलीस निरीक्षक हेमंत पाटील, सहायक पोलीस निरीक्षक भूषण कोते, पोलीस उपनिरीक्षक सागर काळे, स्थानिक गुन्हे अन्वेषण शोखचे प्रभाकर बैसाणे, श्रीकांत पाटील, पोलीस पाटील मनोज गुजर आदी घटनास्थळी दाखल झाले. तसेच ठसे तज्ज्ञांनाही पाचारण केले होते. पोलिसांनी अवघ्या काही वेळेतच मारेकरी काशिराम पावरा याला अटक केली. याप्रकरणी तालुका पोलीस ठाण्यात खुनाचा गुन्हा दाखल करण्यात आला आहे.