जिल्ह्यातील आरोग्य केंद्राच्या इमारती मोडकळीस

ग्रामीण व आदिवासी भागातील नागरिकांना जिल्हा परिषदेच्या प्राथमिक आरोग्य केंद्र व उपकेंद्रातून आरोग्य सुविधा पुरवल्या जातात. या आरोग्य केंद्रामध्ये प्रसूतीसह कुटुंब कल्याण शस्त्रक्रिया करण्यात येते. मात्र, मोडकळीस आलेल्या आरोग्य केंद्राच्या इमारतीतून आरोग्य सुविधा पुरवण्यात अडचणी येतात. जिल्ह्यातील मालपूर व विखरण येथील प्राथमिक आरोग्य केंद्राची इमारत व कर्मचाऱ्यांची निवासस्थाने मोडकळीस आली आहे. त्यामुळे या ठिकाणी आरोग्य केंद्राची इमारत व कर्मचाऱ्यांची निवासस्थाने पाडून ती नव्याने बांधणे आवश्यक आहे. बोरकुंड येथील प्राथमिक आरोग्य केंद्रातील कर्मचाऱ्यांच्या निवासस्थानांची दुरवस्था झाली आहे. याशिवाय मेथी, अमराळे, जोगशेलू, विरदेल, चिरणे, शेवाडे, सुभाषनगर, भाटपुरा, हिसाळे उपकेंद्राच्या इमारतीची दुरवस्था झाली आहे. त्यामुळे उपकेंद्राच्या इमारतीसह कर्मचारी निवासस्थान व संरक्षण भिंतीचे काम करण्याची आवश्यकता आहे. बांधकाम विभागाने केलेल्या पाहणीनुसार मोडकळीस आलेल्या आरोग्य केंद्राच्या इमारती पाडून नव्याने बांधकाम करण्यात येणार आहेत. हा विषय जिल्हा परिषदेची आरोग्य समिती, स्थायी समिती आणि सर्वसाधारण सभेत मंजूर झाला आहे. आता आरोग्य केंद्र आणि उपकेंद्राचे बांधकाम व दुरुस्ती करण्यासाठी आवश्यक असलेल्या निधीची मागणी जिल्हा नियोजन समितीकडे करण्यात येणार आहे. जिल्हा नियोजन समितीकडून निधी प्राप्त झाल्यानंतर प्रत्यक्षात कामांना चालना मिळेल.

जिल्ह्यातील नऊ प्राथमिक आरोग्य केंद्र, सात उपकेंद्रांचे काम; निवासस्थानांचेही बांधकाम

जिल्ह्यातील नऊ आरोग्य केंद्रांच्या इमारतीची दुरुस्ती करण्यात येत आहे. त्यात बोरकुंड येथील आरोग्य केंद्राची संरक्षण भिंत आणि दुरुस्ती, वालखेडा येथे अधिकारी व कर्मचारी निवासस्थानांचे बांधकाम तसेच चार खाटांची नवीन इमारत, मुख्य इमारत दुरुस्ती, मुकटी, शिरुड, धमाणे येथे चार खाटांची इमारत तर निमगूळ, लामकानी येथील केंद्रात दुरुस्ती करण्यात येणार आहे. बळसाणे, वर्धाने, दुसाणे उपकेंद्राच्या आवाराची दुरुस्ती आणि संरक्षण भिंतीचे काम केले जाणार आहे. आढे, खंबाळे, मांजरोद, पिंजारझाडी येथील आयुर्वेदिक दवाखान्याच्या दुरुस्तीचे काम करण्यात येणार आहे. या कामांना प्रशासकीय मंजुरी देण्यात आली. लवकरच निविदा प्रक्रिया पूर्ण झाल्यावर कार्यारंभ आदेश देण्यात येतील.

या उपकेंद्रांचे होणार स्थलांतर : दहा गावांचा पालिकेच्या हद्दीत समावेश झाला. या गावांमध्ये सुरू असलेले उपकेंद्र आता इतर ठिकाणी हलवण्याचा निर्णय घेण्यात आला आहे. त्यात मोराणे येथील उपकेंद्र वार येथे, वरखेडी येथील उपकेंद्र जापी, बाळापूर येथील उपकेंद्र काळखेडा येथील स्थलांतरित हाेणार आहे. जि.प. आरोग्य समिती, स्थायी समिती आणि सर्वसाधारण सभेच्या मंजुरीनंतर स्थलांतराचा प्रस्ताव आरोग्य विभागाच्या सहसंचालकाकडे पाठवला आहे.