‘लाॅकडाऊन’मुळे रोजी गेली; रोटी देणार ‘शिवभोजन’ थाळी

धुळे : कोरोनाचा संसर्ग रोखण्यासाठी महाराष्ट्र शासनाने जाहीर केलेल्या १५ दिवसांच्या कठोर लाॅकडाऊनमुळे रोजी बंद झाली असली तरी शिवभोजन केंद्राच्या माध्यमातून रोटीची मात्र सोय झाली आहे.

लाॅकडाऊन काळात गरीब, गरजूंना मोफत शिवभोजन देण्याची घोषणा मुख्यमंत्र्यांनी केली आहे. परंतु अद्याप शासनाचा आदेश प्राप्त झाला नसल्याचे जिल्हा पुरवठा अधिकारी रमेश मिसाळ यांनी सांगितले.

धुळे शहरात शिवभोजन केंद्रांची संख्या ७ आहे. यात १००, १२५, १५०, १७५ अशा प्रमाणात म्हणजे सरासरी प्रत्येकी १५० थाळ्या मंजूर आहेत. त्यामुळे शिवभोजन केंद्राचा लाभ केवळ ११०० गरजूंना मिळणार आहे. थाळ्यांची संख्या अतिशय कमी असल्याने अनेकांची परवड होणार आहे. निराधारांच्या सोयीसाठी शिवभोजन केंद्र आणि थाळ्यांची संख्या वाढविण्याची मागणी आहे.

शिवभोजन केंद्र ही अतिशय चांगली योजना शासनाने सुरु केली आहे. यामुळे गरिबांचे पोट भरत आहे. लाॅकडाऊनमध्ये मोफत मिळणार असल्याने आणखीनच सोय होणार आहे. थाळ्या वाढवाव्यात.

- मनोहर पवार

शिवभोजन केंद्रांमुळे गरजूंच्या भोजनाची स्वस्तात मस्त सोय झाली आहे. परंतु लाॅकडाऊनमध्ये असंख्य निराधारांची परवड होणार असल्याने थाळ्यांची संख्या वाढविण्याची गरज आहे.

- दीपक बहिरम

११०० जणांना मिळतो दररोज लाभ

लाॅकडाऊनमध्ये गरजूंना मोफत शिवभोजन देण्याची घोषणा मुख्यमंत्र्यांनी केली असली तरी आदेश प्राप्त नाहीत.

सध्या मंजूर थाळ्यांची संख्या लाॅकडाऊनमध्ये वाढवली तर मोठ्या प्रमाणात लाभ मिळू शकतो. थाळ्या वाढवण्याची मागणी आहे.