वाहनचालक परवाना देणे बंद

धुळे : कोरोना विषाणूचा प्रादुर्भाव रोखण्यासाठी राज्य शासनाने १ मेपर्यंत लॉकडाऊन घोषित केले आहे. त्यानुसार प्रादेशिक परिवहन विभाग, धुळे येथील कार्यालयामध्ये शासनाने निर्देशित केल्यानुसार ५० टक्के अधिकारी, कर्मचारी यांच्या उपस्थितीमध्ये कामकाज करण्याचे निश्चित केले आहे, अशी माहिती उपप्रादेशिक परिवहन अधिकाऱ्यांनी दिली.

अत्यावश्यक सेवेसाठी वापरली जाणारी वाहने व वाहन ४.० प्रणालीवर ज्या वाहनाचे फिटनेस मोटार वाहन निरीक्षकाने ॲप्रूव्ह केलेले आहे, अशी प्रलंबित प्रकरणे सोडून नवीन वाहन नोंदणीचे कामकाज बंद राहील. वाहनविषयक कामे हस्तांतरण, कर्ज बोजा नोंद घेणे, कमी करणे याबाबत वाहन ४.० प्रणालीवर प्राप्त झालेली व नियमांची पूर्तता करीत असतील, अशी सर्व प्रलंबित प्रकरणे पूर्ण करण्यात येतील. नव्याने सादर कामकाजासंदर्भात कोणतेही अर्ज स्वीकारले जाणार नाही. अत्यावश्यक सेवेसाठी वापरली जाणारी वाहने सोडून इतर वाहनांचे योग्यता प्रमाणपत्र नूतनीकरणाचे कामकाज करण्यात येणार नाही. वाहन ४.० प्रणालीवर ऑनलाईन पद्धतीने प्राप्त होणारी सर्व परवानाविषयक कामकाज सुरू राहील. शिकाऊ अनुज्ञप्ती, पक्की अनुज्ञप्ती कामकाज बंद राहील. दुय्यम अनुज्ञप्ती जारी करणे, नूतनीकरण सारथी ४.० प्रणालीवर प्राप्त झालेली व पूर्तता करीत असतील, अशी सर्व प्रलंबित प्रकरणे पूर्ण करण्यात येतील. नव्याने अर्ज स्वीकारण्यात येणार नाही. अंमलबजावणी पथकाने रस्ता सुरक्षेशी निगडित वाहनांची तपासणी करण्यात येईल. वाहन अधिग्रहणाचे कामकाज प्राधान्याने करण्यात येईल. सार्वजनिक प्रवासी वाहनातून व खासगी प्रवासी बसमधून होणारी प्रवाशांची वाहतूक ही राज्य शासनाने जारी केलेल्या ‘ब्रेक द चेन’ अंतर्गत जारी केलेल्या सूचनांप्रमाणे होत असल्याची खातरजमा करण्यात येईल. सीमा तपासणी नाक्यावरील कामकाम नियमितपणे चालू राहील.

अभ्यागताना कार्यालयात प्रवेश नाकारण्यात आला आहे. आवश्यक कामासाठी ४८ तासांपूर्वी केलेल्या अँटिजेन चाचणीचा अहवाल सादर केल्यावर सकाळी १० ते २ या वेळेत प्रवेश दिला जाणार आहे. कार्यालयीन आवारात विनाकारण प्रवेश करणाऱ्या व्यक्तींवर कारवाई करण्याचा इशारा दिला आहे.