धुळे तालुका काँग्रेसतर्फे कापडणे आरोग्य केंद्राबाहेर धरणे आंदोलन

काँग्रेस पक्षाच्या पदाधिकाऱ्यांच्या वतीने कापडणे प्राथमिक आरोग्य केंद्रातील वैद्यकीय अधिकारी व्ही. पी. नागे यांना निषेधात्मक निवेदन देण्यात आले. निवेदनात म्हटले आहे की, कोरोना लसीकरण गतिमान करावे. देशात कोरोनाच्या नियंत्रणासाठी केंद्र सरकारने गेल्या तीन महिन्यांपासून लसीकरण कार्यक्रम सुरू केला आहे. केंद्र सरकारकडून देशातील सर्व राज्यांना लसीकरणाचा पुरवठा करण्यात येतो, प्रारंभीच्या काळात महाराष्ट्रात मिळालेल्या लसीमुळे देशात महाराष्ट्राने लसीकरण मोहिमेत प्रथम क्रमांक मिळविला. मात्र, केंद्र सरकारने गेल्या आठवडाभरापासून आपले धोरण बदललेले असून महाराष्ट्र राज्यापेक्षा लोकसंख्येने लहान असलेल्या इतर राज्यांना जास्तीचा लसींचा पुरवठा करीत आहे. महाराष्ट्राचा कोटा कमी करण्यात आल्याने राज्यातील लसीकरण केंद्र बंद पडली आहेत. केंद्र सरकारच्या या सापत्नभावाच्या भूमिकेचा काँग्रेस पक्ष जाहीर निषेध करीत आहे.

कापडणे ग्रामपंचायतच्या सरपंच सोनीबाई भील, पंचायत समिती सदस्य राजेंद्र पाटील, उपसरपंच प्रतिनिधी अंजनकुमार पाटील, माजी ग्रामपंचायत सदस्य शरद माळी, ग्रामपंचायत सदस्य अक्काबाई भिल ,जितेंद्र भिल, प्रवीण पाटील, प्रमोद पाटील, कपिल बोरसे, मनोहर पाटील, नाना भामरे, गंगाराम भिल, पांडुरंग पाटील आदींच्या निवेदनावर स्वाक्षऱ्या असून सदर निवेदन कापडणे प्राथमिक आरोग्य केंद्र वैद्यकीय अधिकारी यांना देण्यात आले आहे.