रेमडेसिविर इंजेक्शन घेण्यासाठी गर्दी

शहरासह खान्देशात कोरोना रुग्णांची संख्या दिवसागणिक वाढत असताना त्यातील गंभीर झालेल्या कोरोना रुग्णांवर उपचार करताना रेमडेसिविर इंजेक्शनची गरज भासत असल्याने संबंधित डॉक्टर ते इंजेक्शन आणण्याचा सल्ला कुटुंबीयांना देत आहेत़ मात्र प्रत्यक्षात हे इंजेक्शन शिरपूर वगळता खान्देशात अन्य ठिकाणी उपलब्ध होत नसल्याने एकेका इंजेक्शनसाठी धडपड करण्याची वेळ कोरोनाग्रस्त रुग्णांच्या नातेवाइकांवर आली आहे़ ज्या खासगी रुग्णालयात रुग्णांवर उपचार सुरू आहे, त्यांच्याकडून या इंजेक्शनची मोठी मागणी असून, ती पुरविण्यात जिल्हा प्रशासन अपयशी ठरत आहे़, तर दुसरीकडे खासगी मेडिकलमध्ये मोठी रक्कम मोजून हे इंजेक्शन घ्यावे लागत आहे़ सरकारी रुग्णालयात रेमडेसिविर इंजेक्शन उपलब्ध व्हावे यासाठी सातत्याने प्रयत्न सुरू असतानाही जिल्हा प्रशासन हे इंजेक्शन उपलब्ध करून देत नसल्याची बाब समोर आली आहे़ त्यामुळे इंजेक्शन उपलब्ध होत नसल्याने त्या ठिकाणच्या नातेवाइकांनाही नाहक त्रास सहन करावा लागत आहे़

मात्र, तालुक्याचे विकासरत्न आमदार अमरिशभाई पटेल, आमदार काशिराम पावरा, नगराध्यक्ष जयश्रीबेन पटेल, उपनगराध्यक्ष भूपेशभाई पटेल व उद्योगपती चिंतनभाई पटेल यांच्या योगदानातून त्यांनी धुळे व नदुंरबार जिल्ह्यांतील जनतेला अत्यल्प किमतीत हे इंजेक्शन उपलब्ध करून दिले आहे़

विशेषत: विकासाची दूरदृष्टी असलेले आमदार अमरिशभाई पटेल यांनी इंजेक्शन पुरवठा करून रुग्णांना दिलासाबरोबरच रुग्णांना वैद्यकीय मदत मिळण्यासाठी विशेष पथकाची नियुक्ती केली आहे़ पटेल बंधू नेहमीच रुग्णांच्या मदतीसाठी धावून जात असतात़ अनेकांना आर्थिक मदतीसोबतच शस्त्रक्रिया मोफत करून देण्यासाठी प्रयत्नशील असतात़ कोरोनाच्या दुसऱ्या लाटेत रुग्णांना बेड मिळत नसल्यामुळे तेदेखील मोफत उपलब्ध करून दिले जात आहे़ माणुसकीच्या नात्याने पटेल बंधू सर्वांसाठी मदतीसाठी तत्पर असतात़ रेमडेसिविर इंजेक्शन गरजू लोकांना मिळते की नाही ते पाहण्यासाठी आर. सी़ पटेल संस्थेचे उपाध्यक्ष राजगोपाल भंडारी, सचिव प्रभाकरराव चव्हाण हेदेखील कार्यरत आहेत़

रुग्णांच्या नातेवाइकांना भर उन्हात मेडिकलच्या बाहेर उभे राहून चटके खावे लागत होते, ते होऊ नये म्हणून त्या ठिकाणी मंडप टाकण्यात आला आहे़