सामोडे येथे बनावट दारुचा कारखाना उद्धवस्त, १ लाख १० हजाराचा मुद्देमाल जप्त

धुळे - राज्य उत्पादन शुल्क विभागाच्या भरारी पथकाने मंगळवारी साक्री तालुक्यातील सामोडे येथे छापा टाकून तेथे एका खोलीत सुरु असलेला बनावट दारु तयार करण्याचा कारखाना उद्धवस्त केला. तेथून १ लाख १० हजार ७९२ रुपयांचा मुद्देमाल जप्त केला तसेच गुलाब बाबुलाल शिंदे याला अटक केली.राज्य उत्पादन शुल्क विभागाच्या धुळे जिल्ह्याच्या भरारी पथकाने मंगळवारी साक्री तालुक्यातील सामोडे येथे जय भद्रा मारोती मंदिरासमोर, व्यायामशाळे लगत असलेल्या खोलीवर छापा टाकला. त्यावेळी खोलीत बनावट दारु तयार करण्याचा मिनी कारखाना सुरु असल्याचे उघडकीस आले. खोलीत बनावट देशी दारु व तयार करण्यासाठी लागणारे साहित्य असा एकूण १ लाख १० हजाराचा मुद्देमाल पथकाने जप्त केला. त्यात ४२ हजाराची बनावट देशी दारु टॅंगो पंचच्या भरलेल्या ८१६ बाटल्याचे १७ बॉक्स, ४० हजाराची इम्पिरियल ब्ल्यू व्हिस्कीच्या १८० मिलीच्या २८८ बाटल्या, १० हजाराचे बाटल्या पॅकींगचे मशिन, ६०० रुपयाचे बाटलीचे बूच, स्पिरीट आणि अन्य साहित्याचा समावेश होता. याठिकाणाहून गुलाब बाबुलाल शिंदे (३१) रा.स्वराज भवन, पिंपळनेर याला अटक करण्यात आली.

कारवाई जिल्हा राज्य उत्पादन शुल्क विभागाचे भरारी निरीक्षक बी.आर.नवले यांच्या पथकाने केली. त्यांना नाशिकचे फुलझळके,एस.आर.नजन, दुय्यम निरीक्षक, के.एन.गायकवाड, दुय्यम निरीक्षक, साक्रीचे प्रशांत दळवी,सहाय्यक दुय्यम निरीक्षक एस.एस.गोवेकर यांच्यासह अन्य कर्मचारी होते.