पिकअप चोरणाऱ्या एकासह साथीदारही जाळ्यात

मोहाडी पोलीस ठाण्याचे सहायक पोलीस निरीक्षक योगेश राजगुरू यांनी या प्रकरणाच्या तपासाला सुरुवात केली असता ३ जानेवारी रोजी रिलायन्स टॉवरजवळील काटेरी झुडपात आसीफ शेख मोहम्मद हनीफ (रा. शंभर फुटी रोड, धुळे) हा आपल्या साथीदारांसाेबत काहीतरी नशा करीत असून, त्याने पिकअप गाडी चोरून नेल्याची गोपनीय माहिती राजगुरू यांना मिळाली. त्यानुसार सापळा लावण्यात आला. पथक तयार करून त्याचा शोध घेण्यात आला. आसीफ शेख मोहम्मद हनीफ याला पकडण्यात आले. त्याच्यासोबत त्याचे जे साथीदार होते, त्यांनाही ताब्यात घेण्यात आले. त्यांना पोलिसी खाक्या दाखविताच त्यांच्या ताब्यातील एक लाख रुपये किमतीची पिकअप गाडीदेखील हस्तगत करण्यात आली. हनीफ आणि त्याचा साथीदार यांना अटक करण्यात आली आहे.

ही कारवाई पोलीस अधीक्षक चिन्मय पंडित, अपर पोलीस अधीक्षक प्रशांत बच्छाव, उपअधीक्षक प्रदीप पाडवी यांच्या मार्गदर्शनाखाली सहायक पोलीस निरीक्षक योेगेश राजगुरू आणि त्यांच्या पथकातील उपनिरीक्षक मुस्तफा मिर्झा, पोलीस कर्मचारी प्रभाकर ब्राह्मणे, तुषार जाधव, अब्दुल्ला शेख, धीरज गवते, गणेश भामरे, सचिन वाघ, जितेंद्र वाघ, अजय दाभाडे, कांतीलाल शिरसाठ यांनी केली. घटनेचा तपास पोलीस कर्मचारी तुषार जाधव करीत आहेत.