वाशीचा वीजपुरवठा ३४ तास खंडित

वाशी : येथील वीज वितरण कंपनीच्या उपकेंद्रातील दोन मुख्य ट्रान्सफार्मरपैकी एक पाच एमव्हीएचा ट्रान्सफार्मर दुरुस्त होऊन चालू होतो न होतो तोच मंगळवारी सायंकाळी वादळी वाऱ्यामुळे व विजांच्या कडकडाटांमुळे वीजवाहिनीत बिघाड होऊन २४ तास तर तत्पूर्वी ट्रान्सफार्मर बसविण्यासाठी १० तास असा एकूण ३४ तास शहराचा वीजपुरवठा बंद राहिला.

वाशी येथील ३३/११ उपकेंद्रातील मुख्य ट्रान्सफार्मर जळाल्यामुळे शहरातील वीजपुरवठा कमी-जास्त प्रमाणात होत होता. त्यामुळे मंगळवारी या ठिकाणी नवीन ट्रान्सफार्मर बसविल्याने ही समस्या दूर झाली. परंतु, याच दिवशी सायंकाळी सहा वाजेच्या सुमारास भूम ते वाशी या मुख्य वाहिनीवर वीज पडल्याने शहरासह परिसराचा वीजपुरवठा पुन्हा खंडित झाला. तो बुधवारी सायंकाळी सहा वाजेच्या सुमारास सुरू झाला. यामुळे तब्बल चोवीस तास व तत्पूर्वी ट्रान्सफार्मर बसविण्यासाठी दहा तास वीज बंद राहिल्याने नागरिकांचे विजेअभावी मोठे हाल झाले.

सध्या कोरोना संसर्गाच्या पार्श्वभूमीवर संचारबंदी असल्याने नागरिक घरात बसून आहेत. शिवाय, अत्यावश्यक सेवेतील दुकाने सकाळी सात ते अकरा या वेळेत उघडण्याची मुभा आहे. यामध्ये प्रामुख्याने दूध विक्री, पिठाची गिरणी आदी व्यावसायिकांना विजेच्या लपंडावाचा मोठा फटका बसत आहे. शहरात कोविड सेंटरलादेखील विजेच्या लपंडावाचा फटका बसत आहे. शहरासह परिसरात पोल्ट्री व्यवसाय करणाऱ्यांची संख्या मोठी असून, सुरळीत विजेअभावी त्यांनाही कोंबड्यासाठी लागणारे खाद्य बनविण्यात अडचणी येत आहेत. शेतकऱ्यांच्या भाजीपाल्यासह इतर पिकांच्या सिंचनाचा प्रश्न निर्माण होत असून, काही शेतकऱ्यांना तर दावणीच्या जनावरांना पाणी देतानाही मोठी कसरत करावी लागत आहे.