उमरगा/बलसूर : सोलापूर-हैद्राबाद राष्ट्रीय महामार्गावरील जकेकूरनजिक गुरुवारी सकाळी चार वाहनांचा विचित्र अपघात झाला़ या अपघातात वऱ्हाडी घेऊन निघालेल्या जीपमधील दोघे मृत्यूमुखी पडले़ तर पंधराजण जखमी झाले आहेत़
मंद्रुप (जि़सोलापूर) येथील चंद्रकांत ख्याडे यांच्या मुलीच्या विवाह सोहळ्यासाठी गुरुवारी सकाळी दोन जीप कर्नाटकातील बसवकल्याणकडे निघाल्या होत्या़ एकामागोमाग निघालेल्या यातील एक जीप (क्ऱएम.एच. १३ डीई ५७२७) सोलापूर-हैद्राबाद राष्ट्रीय महामार्गावरील जकेकूर येथे समोरुन विरुद्ध दिशेने येत असलेल्या ट्रॅक्टरवर (क्ऱ एम.एच. २५/५९११) जाऊन आदळली़ त्याच क्षणी या जीपच्या पाठीमागे असलेली दुसरी जीपही (क्ऱ के.ए.२९ एम.२७११) या अपघातग्रस्त वाहनांवर आदळली़ यापाठोपाठ प्रवासी घेवून निघालेला एक ऑटोरिक्षाही या वाहनांवर येऊन आदळला़
या विचित्र अपघातात जीपमधील वऱ्हाडी लक्ष्मण भिमप्पा नांदणीकर (वय ५२, रा. आयनापूर, जि. बेळगाव) हे जागीच ठार झाले़ तर गंभीर जखमी गुरूनाथ मलाकरी लच्चाने (वय ५८, रा. मंद्रुप, जि. सोलापूर) यांना उमरगा येथील उपजिल्हा रुग्णालयात मयत घोषित करण्यात आले़ दरम्यान, याच अपघातात वऱ्हाडी जीपमधील गुरूनाथ सिद्धलिंग माळी, श्रीशैल्य अमोक्षित कुंभार, गौरीशंकर भगवान सुतार, कन्नाप्पा विठ्ठल धुळखेडे, आप्पाशा सिद्राम लोभे, जगदेव विठ्ठल धूळखेडे, महादेव सुर्याप्पा शेळे, मळसिद्ध विरप्पा मुगळे, शिवानंद कल्लप्पा नंदुरे (सर्व रा. मंद्रुप जि. सोलापूर), रमेश जिवाप्पा कांबळे (रा. विंचूर जि. सोलापूर), दुर्योधन महादेव नांदणीकर (रा. आयनापूर, जि़बेळगाव) हे अकरा जण जखमी झाले आहेत़ तर ऑटोरिक्षातील लतिफ रहेमान मातोळे, रियाज जिलानी जमादार, संतोष गणेश जाधव, मानव दत्ता गायकवाड (सर्व रा़ जकेकूर, ता. उमरगा) हे चौघे गंभीर जखमी झाले़ सर्वच जखमींना पुढील उपचारासाठी सोलापूरला पाठविण्यात आले आहे़ दरम्यान, या जखमीतील आणखी तिघांची प्रकृती चिंताजनक आहे़