तुळजापूर (जि. उस्मानाबाद) : तुळजापूर-उस्मानाबाद रस्त्यावरील आपसिंगा कॉर्नरजवळ दुचाकीला भरधाव ट्रकने पाठीमागून जोराची धडक दिल्याने दोघे जण जागीच ठार झाल्याची घटना बुधवारी दुपारी १ वाजताच्या सुमारास घडली. अपघातानंतर पळून जाण्याच्या बेतातील ट्रकचालकाने वाहन ८० फूट तसेच फरफटत नेल्याने यातील मृतांचा चेंदामेंदा झाला.
तुळजापूर येथील आपसिंगा रोडवरील शिक्षक कॉलनी भागात राहणारे कैलास लक्ष्मण पवार (५०) व दत्तात्रय वसंतराव जगताप (५२, रा. वेताळनगर, तुळजापूर) हे बुधवारी दुपारी दुचाकीवरून शहरात जात होते. आपसिंगा कॉर्नरवरून दुचाकी मुख्य रस्त्यावर येताच पाठीमागून भरधाव आलेल्या ट्रकने (क्र. जीजे ३६ व्ही ४९३३) जोराची धडक दिली. या अपघातात दुचाकीवरील दोघांचाही जागीच मृत्यू झाला आहे. या अपघातानंतर ट्रकचालक पळून जाण्याच्या उद्देशाने त्याने वाहन तसेच दामटले. त्यामुळे दुचाकीवरील दोघे जवळपास ८० फूट फरफटत गेले. यात त्यांचा चेंदामेंदा झाला.
अपघातस्थळावरील युवकांनी ट्रकचा पाठलाग करून त्यास पुजारी मंगल कार्यालयाजवळ गाठले. चालकास ताब्यात घेऊन त्यांनी त्यास पोलिसांच्या हवाली केले. अपघाताची माहिती कळताच घटनास्थळी पोलीस निरीक्षक अजिनाथ काशिद, उपनिरीक्षक बसवेश्वर चनशेट्टी, कर्मचारी विजय राठोड, अजय सोनवणे, अजितकुमार सोनवणे यांनी धाव घेऊन पंचनामा करीत वाहतूक सुरळीत केली. याप्रकरणी तुळजापूर ठाण्यात रात्री उशिरापर्यंत गुन्हा नोंद करण्याची प्रक्रिया सुरू होती.
छिन्नविच्छिन्न अवयव केले गोळा...अपघातस्थळी छिन्नविच्छिन्न अवस्थेत पडलेले मृतांचे अवयव अक्षरश: गोळा करून पोत्यात भरावे लागले. पोलीस कर्मचारी विजय राठोड यांच्यासह दुर्गेश साळुंके, आण्णाभाई क्षीरसागर, संतोष साळुंके यांनी मृतदेह व अवयव एकत्र करून एका वाहनाद्वारे उपजिल्हा रुग्णालयात शवविच्छेदनाकरिता पाठविले.