आदित्य गोरे यांच्या वाहनावर दगडफेक

कोरोनाने आई-वडिलांचे छत्र हरवलेल्या मुलांच्या अडीअडचणी जाणून घेण्यासाठी राष्ट्रवादी वेल्फेअरच्या वतीने अभियान सुरु आहे. त्यानिमित्ताने भूम तालुक्यातील जातेगाव व कुक्कडगाव या ठिकाणी अशा अनाथ मुलांना भेटण्यासाठी आदित्य गोरे हे उस्मानाबादहून निघाले होते. त्यांची कार (क्र. एमएच २५ / एएल ००२०) राष्ट्रीय महामार्गावर असलेल्या पारडी फाटा येथून भूमच्या दिशेने जात असताना मागील बाजूने गाडीवर अज्ञाताने दगडफेक केली. यावेळी पुढील कार्यक्रम असल्याने गोरे यांनी गाडी न थांबवता तसाच प्रवास चालू ठेवला.

दरम्यान, या दगडफेकीत गाडीच्या मागच्या बाजूची काच फुटली असून, यामध्ये गाडीमधील आदित्य गोरे व कळंबचे राष्ट्रवादीचे पदाधिकारी समाधान बाराते हे दोघेही सुखरूप असल्याचे गोरे यांनी सांगितले. या घटनेबाबत वाशी पोलिसांना फोनद्वारे माहिती दिली असून, कार्यक्रम संपताच ठाण्यात येऊन तक्रार देणार असल्याचेही ते म्हणाले.