सोयबा सिध्दीकीची राष्ट्रीय स्पर्धेत धडक

उस्मानाबाद : राष्ट्रीय रायफल शूटिंग असोसिएशनच्या वतीने अहमदाबाद (गुजरात) येथे आयोजित आठव्या वेस्ट झोन रायफल शूटिंग चॅम्पियनशिप स्पर्धेत उस्मानाबादच्या सोयबा तौफिक सिद्दीकी हिने चमकदार कामगिरी करत पाचवा क्रमांक पटकावला. तिची ऑक्टोबर २०२१ मध्ये इंदौर येथे होणाऱ्या राष्ट्रीय रायफल शूटिंग स्पर्धेसाठी निवड झाली आहे. या खेळामध्ये राष्ट्रीय स्पर्धेपर्यंत पोहचणारी सोयबा सिद्दीकी ही उस्मानाबाद जिल्ह्यातील पहिली खेळाडू ठरली आहे.

या स्पर्धेत ९८० स्पर्धकांनी सहभाग नोंदवला होता. महाराष्ट्र रायफल असोसिएशन, मुंबईच्या संघामधून उस्मानाबाद डिस्ट्रिक्ट रायफल असोसिएशनची खेळाडू सोयबा सिद्दीकी हिने पाचवा क्रमांक पटकावत नेमबाजीमध्ये उस्मानाबाद जिल्ह्याचा लौकिक वाढवला आहे. या यशाबद्दल उस्मानाबाद डिस्ट्रिक्ट रायफल असोसिएशनचे अध्यक्ष व कोच अजीम शेख, सचिव शाहीन शेख, कोषाध्यक्ष फेरोज पल्ला, सदस्य तौफीक सिद्दीकी, राकेश पवार, आकाश मोरे, मयूर दुरूडकर, चेतन सपकाळ यांच्यासह क्रीडाप्रेमी नागरिकांनी तिचे कौतुक केले.

चौकट.........

विभागीय स्पर्धेत सुवर्ण पदक

उस्मानाबाद डिस्ट्रिक्ट रायफल असोसिएशनची सोयबा सिद्दीकी ही अतिशय सामान्य कुटुंबातील मुलगी आहे. वडील तौफीक सिद्दीकी हे शेती करून कुटुंब चालवितात. आपल्या मुलांनी कुटुंबाचे नाव उंचावले पाहिजे म्हणून त्यांनी सोयबा हिस प्रोत्साहन दिले. सोयबा हिने रायफल शूटिंग क्रीडा प्रकारात आवड दर्शविल्याने तिला तौफीक सिद्दीकी यांनी संपूर्ण पाठबळ दिले. दीड वर्षापूर्वी लातूर येथे झालेल्या विभागीय स्पर्धेत तिने सुवर्णपदक पटकावून राज्यस्तरीय स्पर्धेत पाऊल ठेवले होते. आता रायफल शूटिंगसारख्या क्रीडा प्रकारात राष्ट्रीय स्पर्धेत धडक घेणारी उस्मानाबादसारख्या भागातली ती पहिली खेळाडू ठरली आहे.